السودان الوطن الواحد
شبكة بربر

الرئيسية أضفنا للمفضلة روائع منتديات شبكة بربر أجعل شبكة بربر صفحة البداية ملخص قرارات الإدارة الاتصال بالادارة
 ما شاء الله تبارك الله ما شاء الله لا قوة إلا بالله ، اللهم إني أسالك الهدى والتقى والعفاف والغنى

قوانين وضوابط المشاركة في المنتدى تفعيل العضوية طلب كود تفعيل العضوية استعادة كلمة المرور التسجيل

قـوقـل: شـبـكـة بـربـر أكـبر مـوقـع لـتـجـمـع الـشـباب الـسـوداني والمـواضـيـع الــهـادفـــة

شبكة بربر تهنيء المشرفة ميمي الدكة بمناسبة الزواج

قديم 03-19-2008, 05:24 PM   #1

خبير
 
الصورة الرمزية الفنوب

 








الفنوب غير متصل
افتراضي مساعدة مستعجلة شديد ،، داير قصيدة طه وريا وود دكين مسموعة

 
السلام عليكم أهلي ناس بربر الطيبين ،، عذراً للغياب الطويل عن صفحات منتدانا الغالي ،، ولكن كلي ثقة في أنكم تعذروني لظروفي الصعبة جداً في هذه الأيام ,
أنا داير قصيدة طه وريا وود دكين مسموعة لو أمكن وكمان لو بقت ام بي ثري يكون ما قصرتو كلو كلو

ساعد في نشر شبكة بربر والارتقاء بها عبر مشاركة رأيك في الفيس بوك

 
 
 
 
 
 
التوقيع

نقره لعرض الصورة في صفحة مستقلة

    رد مع اقتباس
قديم 03-19-2008, 06:24 PM   #2

امير العضيم

مشرف المنتدى العام
 
الصورة الرمزية امير العضيم

 








امير العضيم غير متصل
افتراضي

 
تروي الروايات ان هذه الواقعة وقعت حوالي عام 1818 ميلادية وكانت الواقعة الشهيرة بقتل احد فرسان البطاحين حمد ود دكين زعيم الشكرية واحتمي البطاحين بابناء عمومتهم الجعلين وعلي راسهم المك نمر وكادت الحرب تقع بينهم ولاكنها انتهت الي الصلح
وصور الشاعر الكبير ابراهيم العبادي هذه الواقعه مع اضافات ادبيه جمه ومحشنات افضت بها الي مسرحية شعريه بقت اثر عظيم لتلك الواقعة التي تناسي التاريخ سببها الاصلي وبقيت ابيات الشعر والحان القوافي ......
قال طه :
أخوك يا ريا وكت الخيول بدبكن
أخوك يا ريا وكت الرماح يتشبكن
اخوك جبل الثبات وكت القواسي بحبكن
كم بكيت وكم قشيت دموع الببكن
قالت ريا
وراك اسود علي ما نمت اسع طيب
قل طه
بسم الله قولي اخوك طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب
الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس انا ما بخافو لقاهو
ياليت الحلم في صحيا كان بلقاهو ...
قالت ريا
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه
قليها طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه
قالت ريا
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها
وقعدت ريا تبكي
رد عليها طه وقال
ما بفيد البكاء وكلامي احسن تنسي
قالت ليه ريا
كيف ما ابكي وكيف افوت مراتع انسي
افقد كل شي عزي ورجالي وانسي
تطلق فوقي نار عقبان تقول لي انسي ..
كنا في سيرة لقاء طه وريا وهم بيحكوا لي بعض قصة الحلم
قال طه : فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمان قطْ ما اتمدت
ما بنهد شرفنا لو السماء إنهدت
قالت ريا : خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك
قلل طه : خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول
قالت ريا : وريني الحلم التورك مزهول
قال طه : أصبري لي أروق حبل الفكرمبهول
احكيلك شنو الشفتو والله مهول
شفت الوحده شفت النار وشفت الهول
أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه
قدر ما نشوف قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي قعدتي ,انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كور صقور تبراكى
تبت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن
قالت له ريا : عارض ومات خلاص لي الليلة يمكن عفن ..
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
بطال البعيش في الدنيا اصلوا غناه
ان كان مالو راح غير اهله مين يدناه
سمح لبفوق اساس ابواتو تمه بناه
والزول دون قبيله غناه شن معناه
ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا
كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضضقناه
سمح الزول صبي يد ويربي جناه
طبعاً ريا ما قبلت الكلام ده لانو ابوها عبد الله المعروف بابو كبس ما تم سنه من وفاته والناس في حالة حداد فقالت
دا الاعوج تراه ووالشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو
إن كان في الفريق ماتت مريه ذليله
لي الحول يرفعوا العرس الدخاتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة
خليه الكلام وعرسنا في ده الحال
من بالك أمرقو محال والف محال
علي ميتت ابوي لي الليله حول ما حال
نصبح بكره ونسه وبهادل حال
رد عليها طه وقال ليها
الموت ما شمت غاية البخود والببروا
والموت والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في أخر المراح دايماً تجي الفترانا
هادة الحد ندوس والناس عقب تبرانا ...
بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد
فقالت
الناس بالمكارم والفعال بتباهو
زي الفطرة ينشا الزول حسب مرباهو
عاة جدو عادتو ونحل ابوه نباهو
يلبس ثوب قبيلته ان داره ولا اباهو
من الليلة حول مضيوه تاني اتكلم
الدايروا بيتم رب العباد ان سلم
رد عليها طه
تاني امضي حول وانا بالحسا اتالم
علي حكمك صعب انا قابله ما بظلم
نستني السنة قاسية وصعيبه علينا
ردت عليه ريا
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو
وتقوم ريا فايته علي الفريق وطه يعاين فيها وهي ماشه ويقول
ياليت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفب اخذوا الديه
اموت بالعطش والمويه بين ايديا
اه يا رب ارحم صبري امس ضنين
يمحف ديه السنه ربي الحليم وحنين
يخصمه من حياتي رضيت بعشرة سنين
وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال
بالضيفان تمري لا لام لا كلام
صدقوا اهل المثل توب العرب صح لام ...
قام واحد من العرب نادها
بالضيفان تمري لا سلام لا كلام
صدقوا اهل المثل توب العرب صح لام
ردة عليه ريا
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتك كيف
قام العربي قال ليها
من وين في الاهل كفاك فخر يا بنية
ردت عليه ريا
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه
قام رد عليها ود دكين طبعاً عرفها انها هي زولتوا العاوز يعرس زاته فقال
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا
فردت عليه ريا قايله
كما يسد مكانن قدموا ليش يوطاها ( يعني ماشي في الواطه ليشنو غير اكرام الضيف واغاثة الملهوف )
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي و وشيه
رد عليها و دكين
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المطريه
قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو
قالتلوا ريا
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديث يعرف أبوه وجنسوا
فرد عليه العربي
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه
ده خريف البطانه المالوا فيها مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك
ردت عليه ريا
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو إنت جانا نجري ونخدموا حفايه
رد عليها ود دكين
بارك ربي فيك عقلك يدوم يا ريا
كرمك ماهو كلفه ديه طبعتك فطريه
إياك بت التلوب والسمته فيك محريه
قديم فوت البطاحين عزه للشكريه
في الوقت داك جاء طه ووجدتهم واقفين فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدرنا
تنزلوا في الدرب مالنا ماتت نارنا
رد عليه شيخ العرب
حباب طه الضرس والفي الصهيباب راس
الجود والكرم يلك قديم ميراس
نارك ما بتموت با ولده الفراس
قاصدين ام شديد ومعانا عوجه راس
رد عليه طه
لعدوك العوج يا الفي الكبس سراي
راسك ما بدوس مليان رجاله وراي
باكر لي ام شديد اركب معاك براي
يا شيخ العرب لاكن تختوا كراى
 
 
 
 
 
 
التوقيع

نقره لعرض الصورة في صفحة مستقلة

    رد مع اقتباس
قديم 03-19-2008, 06:27 PM   #3

امير العضيم

مشرف المنتدى العام
 
الصورة الرمزية امير العضيم

 








امير العضيم غير متصل
افتراضي

 
طبعاً شيخ العرب ما فهم كلمة كراى ديه فقال لي طه ..............
هادي الشورة يا طه الغلبني دليله
كل البزمه القاهو فيك قليله
رد عليه طه شارح ليه كلمة كراي
كراي الدايروا تبقوا ضيوفنا انتو الليلة
ترقدوا في الفريق حتي ان عشانا بليله
رد عليه ود دكين
مسكنا الدرب أسرع قوام ما تلعب
دارك ديمه عامره والسمح ما بكعب
يكفين الوصف لاتشد جمل لا تتعب
وهدنا الطريق عقب الوصول ما بصعب
رد عليه طه
يمين تغشوا الفريق بتفوتوا نحنا مقابر
رد عليه شيخ العرب
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر
رد عليه طه
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخذ خاترنا نحنا قالوا واصله السايقه
بتراوح ام شديد باكر زواملك فايقه
رد عليه ود دكين
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله فيه زولين ما بختلفو
ضروري اصل ام شديده علي وعد بي حلفو
ما بعرف ازوق من نشيت تبيت
فريقكم لي فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت
شوفتي للفريق ايام بكي ابواتك
ما غابني حالك سمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك
يا ود الهميم النفسوا ما معارضاه
كرم الضيف عليك مكانه ابوك فارضاه
جاييك في امر ان تابه وان ترضاه
غيرك ما بكوس واملي بس تقضاه
رد عليه طه
غرضك مقضي كان احتاج لخيل وجمال
والضان والابل سارح يمين وشمال
ردعليه ود دكين
فوق القولتو انا لي فيك امال
رد عليه طه
بي دمي الغرض اقضاهو خلي المال
المهم طه زي فهم شيخ العرب وده ماشيلوا جاي وطه ماشيلوا علي المال
فرد عليه شيخ العرب
دي المأموله فيك وين الدرب خترنا
رد عليه طه
دربكم في السلم
قالوا شيخ العرب
والله تب ما ودرنا
بكره نجيك ان قلينا ولا كترنا
وهنا ودعهم شيخ العرب وسار بي جماعته قاصد ام شديد وعلي اساس في اليوم التاني ينزل ضيف علي طه وقبيلة البطاحين
وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا
في البال لي ضمير شيخ العرب متعوب
قايم نفسه يختف في الكلام مرعوب
ما خاتيلوا شئ ما شوفتي كيف مرعوب
حمد ود دكين مرتع دياروا وربعوا
ده الشئ السمعتوا من الاباه والتبعو
الراجل فاعيلوا يبين لك طبعوا
انا ود الخلا البعرف اسوده وضبعو
ردت عليه ريا
اعوج كان يخلف الليله ميعاد جيتو
رجال وحريم كل اهل الفريق في رجيتو
قطعوا السارحه كل زول في مراحو سعيتو
كبار وصغار و حتي الراعي خله رعيتو
قال ليها طه
محال يخلف محال قال جايبو غرضاً عندي
ردت عليه ريا
كــان غـرضاُ صـعـب ؟؟؟؟؟
فقالت لي طه
كان غرضاً صعب
رد عليها طه
كان رأس نمر في شندي
وعدتوا أقضاه وابذل كل جهدي العندي
كان بالمال وكان بالراى وكان بي زندي
قالت ريا :
هيلك من زمان غنت البجيك تحجالوا
لاكين ود دكين عامر قديم برجالو
قال ليها طه :
يا ريا الكلام ده اخير تقفلي مجالو
وكت اوعدته بقضالو غرضو الجالو
وفي وقفه طه وريا يجوهم ثلاثه من ابناء البطاحين عبدالله وخلف الله واحمد
قال عبد الله
سلام يا طه
قال طه :
مرحب بي كبار قبيلتي وعزي
مرحب بالاسود البفقعوا المستهزي
ريا جات قبيلتك فوقه انكعى هزي
وإن زحينا يوم الحارة قرنك جزي
ردت عليه ريا :
اولاد بطحان تعيشوا ويزيد مراحكم ناير
وناركم في سرات الوادي تهدي الحاير
بتحلو المضيق وتصدوا غارات الغاير
ما هيلم تزحوا إن كان يزح الداير
قام خلف الله لما سمع الكلام ده خاف وارتجف واصابته خوفه كده
فناداه عبدالله قال
خلف الله ولدي اقعد قبال ود عمك
كلام ريا هادا بشوفه غير دمك
من زمن بعيد أتمني أسمع نمك
فرج همنا مولاي يفرج همك
دوبينا ......قول ... دوبينا
قال خلف الله
الولد البخاف من القبيلة تلومو
بخلف ساقوا فوق تيساً رقيق قدوموا
اما يجيب رضوه البهم البينقر فومو
وإما تخامشن قدح الرماد حرومو
سنابك حضر الطافه و جرايدك نوا
كورك سال و مزيقا و رطانه و عوا
الخلاني فوق نار أم لهيب أتلوي
النوم شفتو يا قرد القلوع شن سوا
أكل الشلخه لامن كمل المنسية
شمخ الحورى لبعصه عريب بت ريه
أكان ما أسكت الباكيات و أخلف الكيه
قوله أبو فاطنه يا الصادق خساره عليا
خرير دوماتو فوق عاجن رسن متلاقيه
يا الغول النقيب سويلو سوق الساقيه
بت معز الخلا الفوق الكجر متاقيه
عكرناها يا أمروبه النشوف الباقيه
وبعدين ظهر ود دكين في جماعته جايين علي الفريق
فقال طه :
هداك ود دكين بي زمله بان شفناه
دار اليوم يروح خلف الوعد خفناه
الراجل في الاصول ما خاتي لي معناه
يا ريه استعدي الزول جمعنا عناه ...
شيخ العرب قال:
ولاد بطحان سلام اهل النبا و الشكره
سلام عز العرب اهل الفحل والبكره
سلام يا طه يا راس الكرم والضكره
جيت لي غرضي يا طيب الاصل والذكره
رد عليه طه
مرحبتين حباب مرحب خريف الرازه
حباب شيخ العرب البيه القبائل عازه
حباب سيف العرب البيه هاشه وهازه
في يمنك قبيلتاً ما تقبل فازه
قام عبد الله قال : هيا جايهو الزمل
رد شيخ العرب
خليه يا عبد الله
غرضي إن كان ما أنقضى أنا زملي ما بتدله
رد عيه طه
الناس في رجاك من الصباح في مله
كدي شوف الطعام شيخ العرب بسم الله
رد شيخ العرب
ما باكل طعام كان ما حساب اتضرب
وقضيان الغرض فيكم حقيقه مجرب
الامر العنيتو كما اتدرب
ما بنفعني اكل وما بيرويني مهما اشرب
فقام عبدالله وقال
ياشيخ العرب امرك خلاص همانا
قول غرضك عديل خصصنا او عمانا
عسع نقضى ليك في محلنا اللمانا
كان بي مالنا كان بي دمانا
رد ود دكين " شيخ العرب "
عندكم الغرض لا بدور قلم لا ورقه
ماغرضاً تسافرو لو وتقيسوا الفرقه
يقضي ان قولتوا خير مابدورلو سيف لا درقه
وان قلتوا لا يروح شمار في مرقه
ما مقبوض وجيتكم لاجي فوقي جنيه
بي خيري ومراحي وتاني نفسي غنيه
جاييكم نسيب تدوني بطحانيه
رد عليه عبدالله
خير سميــها
رد ود دكين
في بت ابكبس لي نيه
قام عبد الله رد عليه .....؟؟؟؟
 
 
 
 
 
 
    رد مع اقتباس
قديم 03-19-2008, 06:29 PM   #4

امير العضيم

مشرف المنتدى العام
 
الصورة الرمزية امير العضيم

 








امير العضيم غير متصل
افتراضي

 
قال عبد الله
يفتخروا البطاحين ساحتم راحبالك
لكن ريا امرها مقضي من قبالك
فات فيها الفوات لي طه هاد قبالك
من دون ريا قول الدايروا في بالك

ده فريق الصهيباب مافيهو واحده حقيره
مال ورجال وعز في الحله مافي فقيره
كثير الزي ريا مليان البلد من غيره
ان درت الضغار وان كان قصدت صغيره
قام شيخ العرب قال
إن مال الشجر ما بكسرن فراعو
وقمحان الطلب لي المابجيبه ضراعو
ليه يا أهلنا البيناتنا ما بتراعوا
القال راسي موجوعني يربطولوا كراعو

قالم عبد الله قال
حبل المهله يربط انت ارتاح بيت
بكره نمر سوي ونلفي البيوت بيت بيت
سمي الدايره ولوم البقولك ابيت

رد عليه شيخ العرب
يمين بالله غير الغايه مالي مبيت


هنا طه حز الكلام في نفسه لانه شيخ العرب بينوا ليه انه ريا مخطوبه وبعد ده هو بصر وبجادل فقام طه وقف وقال

يا شيخ العرب أمرك بشوفو حقاره
وما جايباك مره الجابتك بس غارة
وقرناك كثير ونفسك ابيت وقاره
خبرك هادا ما دايرلو دق نقاره

قام واحد من اعوان شيخ العرب اسمه علي ووجه الكلام لي طه وقال :
قبلك في اللجج يا طه راحو الهدو
تتجاسر علي شيخ العرب بتهدو
زولكم ماعقل يا كبار كما تهدو
بعنادوا الفريق خايف يسبب هدو

هنا الجو المجلس توتر وقام طه قال
انا المالح الكارب خريفي وصيفي
المثلك تبيع ما بطول فوق قيفي
كما الليله في بيتي وبعدك ضيفي
في الشي السمعتو برد عليك بي سيفي
هنا قال شيخ العرب
كفي يا بطاحين فيكم اتغشينا
كرمكم جانا طامح رخصه اتعشينا
بعد الشى السمعنا كان ما مشينا
خايف في اجتماعنا تقع وقايعاً شينه

في وداعة الله عقب بيناتنا ما في علاقه
وات يا طه اتشفيت شبعت شلاقه
عمرت الشر سعيت دليته بي معلاقه
نحن وانتو بعد الليله يوم نتلاقه

قام عبد الله عاوز يرضي شيخ العرب ود دكين فقال
من ولدك زعل كل البلد بتكاورو
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو

رد عليه شيخ العرب
ضيف الغابه حالف ده الفريق ما أجاورو

قام عبدالله قال
سمح ارجانا يمكن طه نحنا نجبروا

رد عليه شيخ العرب
الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبروا

رد طه علي شيخ العرب و قال
سوي الدايره وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقه كل واحد بعرف الليهو

هنا خرج شيخ العرب ود دكين وعيونه يقدح منها الشرار وكبر الشر في نفوس الفريقين
وقام طه جاري في ظهر شيخ العرب ...... قام واحد من البطاحين اسمه احمد مسك طه وقال
أقيف يا طه عندي نصيحه ليك ابداها
هنا خرج شيخ العرب ود دكين وعيونه يقدح منها الشرار وكبر الشر في نفوس الفريقين
وقام طه جاري في ظهر شيخ العرب ...... قام واحد من البطاحين اسمه احمد مسك طه وقال
أقيف يا طه عندي نصيحه ليك ابداها
العقده الصعيبه العاقل بيتعداها
الشكريه كثره نحنا مانا لداها
انا عندي العرب بريا أخير نفداها

رد عليه طه
ده راي السديد يا احمد تراك بي فكرك
روح لي ود دكين وريهو يسمع شكرك
يديك مال كثير وقبيلتو ترفع ذكرك
تصبح عمده فوق روسينا تخلف حكرك

قام رد علي طه عمه عبد الله فقال
ليه أحمد تهينوا نصيحتوا ما ضاراك
ما حق النقص وانت بتعرفوا براك
وكت بتسوي عوسك وما بتشوف بي وراك
نشاور ريا ممكن ريا ما دايراك

رد طه وقال
صدق القالوا خربانا البلد بكباراه
ديك ريا أسألوها واعرفوا خباره
من غير السفر ما عندي تاني دباره
نحنا وانتو بي دي الحاله ما بنتباره
 
 
 
 
 
 
    رد مع اقتباس
قديم 03-19-2008, 06:34 PM   #5

امير العضيم

مشرف المنتدى العام
 
الصورة الرمزية امير العضيم

 








امير العضيم غير متصل
افتراضي

 
احمد: يا طه المصاعب للقبيله تقودا
مسافر وين مخلى النار بوراك موقودا
طه: انا السمتان جليس الردفولا عقوده
حد السيف بقطع عقدتو المعقوده
ما ولعت ناراً انتو تقعو فيها
شن دايرين براى وانا نارى مدفيها
أحلف ليك يمين دى الحله متقفيها
باكر من صباحى قبل يحس الفيها
عبدالله: نحن كبار اخيرلك ترضى بعرفتنا
مع الشكريه احسن نشترى الفتنا
ندى ود دكين ريه ونكتل الفتنا
ما من خوف ملاقات الرجال حرفتنا
طه: من الفيها ما بزح ان تزحزح مره
وان حين نعود ان طال زمنا ومره
عيش الدنيا ان كان يحلى وان كان مرة
الزين ما بدوم والزول بموت فت مره
عبدالله: وقت صممت ما ترجع وتسمع قولنا
وسفرك دا محال ما بقبلنو عقولنا
الموت ما بنخافو الخوف يمبن مُوهلن
بنعاين بعيد بنخاف بهادل عونا
الشكرية بسيوفنا صغيرنا معتق
ما بنابا القتال ونقول جرحنا اتفتق
مرحبتين حباب الشر محل ما بتق
تنقد الرهيفه إنشاء الله ما تدلتق
طه: الشكريه غوش واكتر علينا حساب
وضيف ليهم يمبن ما بتربطو الأنساب
أنا لغارتم حسبت الف حساب
لو تتعدوا رأى يمين عذابكم ساب
بجيكم حمد ومعاهو الرجال تابعاهو
قولولو طه طفش وريه معاهو
كيف نرضى السفيه الادبه ما برعاه
يرفض طلبك ات ونحن كيف نسعاهو
ابقوا قصادى وحدى القبيله معايد
عقبال من رجع فوق الخسائر عايد
وان كان دارنى انا ما بترجع جموع الزايد
وان حصلنى قط ما اظن يعود بفايد
عبد الله: ما بقيف ودكين واصل السرج ملعوق
وفى دربك بسوق واياك يا طه ملحوق
وات صنديد تصد الميه ما ممحوق
بنخاف كترتم ويد الرجال بتحوق
طه: ليه خايفين علىّ الدنيا عيشا مخاطر
الواجب نسوى ونرجى ستر الساتر
فى وداعة الكريم الليله فى نيتى خاطر
يا دار ريّه ما كان الفراق بالخاطر
كفايه مع السلامه انتهيت خلاص
غير الشوره دى مالينا تانى خلاص
فى نيتى حرير الدكب القصاص
ما بخاف ودكين ان جانى بالرصاص
(قام مارق منهم وساق بت عمه ماشى بيها طبعاً لارض الجعلين..ماشى للملك نمر يوريه على ان نسيبك دا جاى يقلع منى بت عمى -قام مارق- بعدين احمد قال لعبد الله)
أحمد: عم عبد الله خبرك هذا شيتن فاجع
كيف بنطاوعه من بيناتنا يطفش ناجع
عبد الله: سمعت كلامو من الفيها ما متراجع
وفى الشىء الشايفو غط بهينه ما بيعود راجع
أحمد: نركب نلحقو نخليهو يمشى براهو
عبد الله: شورة القال اخير ما نلحقو ونبراهو
العاقل بحسب للتقيل تافراهو
بنفكر على القدامو والبواراهو
أحمد: فوق السقوط قط فى ظنى ما يخلوهو
كيف موقفنا ساعة يلحقو يكتلوهو
عبدالله: ان وقع القدر ما بتقدرو تصدوه
ودا كتر الكلام اسع اخير تخلوه
( بعدين آ..آ..آ ساق بت عمه وفى الخلا كان بحجى فيها وقاليها)
طه: درقى يكركب كيمُ
رُكبى يشيل بر عمه
أصلى بطرز امه
منى تحود الأمه
جمل يكسر الغربه
سيف يحل من مجربه
قلبى سنين تربه
ما بتدمانى الغربه
يا ريّه الحلم ما شفتى كيف اتهول
واتفسر براهو وبالشين علينا اتأول
داخل راسى فكراً منو ما بتحول
بكتلو ود دكين ان كان قرب او طول
ريه: اسود ود دكين باسمو ما تحجيبنا
هو الفرقنا قمنا من البلد هجينا
عقب فى دار جعل تانى الخراب ما بجينا
ما بسوى الرماد المك نمر بحجينا
ريّه: ماك شايف الدرب
طه: ما شيهو بكرعىّ تلات ايام وضحى وكان معاى سعيه
كيف يلحقنا زول شندى ومعاه معيه
قبيلة دار جعل محميه فيها اسودا
تقدل بالكارم ديمه وحاقدا حسودا
رأس المك نمر كل القبيله اسودا
ركازة القبائل فى السنين السودا
بكره نجيه وسيفاً يجيك بولادو
العز والكرم من الكبار تيلادو
ما أظن ود دكين بشينه يوطا بلادو
ما خد بت اخوه شمه ام اولادو
ان ودعتك المك ما بخاف المتلو
اهون من شراب المويه عندى اكتلو
وارجع للبطاحين تانى وراينا نفتلو
والشكريه تقيو غير حرب ما بتلو
يا ريّه البطاحين أصبحت محقوره
على الشكريه دايما سارحتم مدفوره
ما بتقال عز وتعيد مكان وقوره
إلا الغاره وتقضى صقورة
ريّه: فى داب الشديدة ابقالنا قوم دربنا
بوصفك دحين من شندى نحن قربنا
ما بنفتق عشنا بالفتقه دى نفرقنا
ما بنوم الرجال امكن يمسكوا دربنا
طه: يسمع حركه
ريّه: شد ديل يبقى رعاويه
طه: حركه صُهب دا ركوب سروج مو رعويه
وقربن مننا وفى ظنى ناسها شويه
وكان ناس فزع ما بجيبوا حتى ضويه
ريّه: يا هم ناسنا خمسه عقاب رجال'' وينو
ما بتشوف ودكين برز براهو هوينو
طه: الشىء البين نحن سعينا لتهويلو
وضايقنا الصعج ما أظنو يعود لعويلو
الناس المعاهو عرب صعيد يا ريّه
ما اولاد عم ديل والله ما شكريه
معروفين تمام فى كل بلد وجريه
كان حفرولو بير ولقوه شجره ضريه
عارفين ود دكين ما بهم بخيل وجمال
بكتلنى وبسوقك وهم بسوقوا المال
وبكتلو ود دكين ودى الطانها فى فكرى
بتشوفى الفضائح المابجيك من شكرى
الشكريه فرسان ومستحقين شكرى
دا الصح قلتو ليك انا لا بخاف لا مكرى
ريّه: يا طه استعد الناس عنونا عديل
طه: وين شفتى القطاع بتسوى هم قُديل
بضاير العوقه اخوك الما بهم من ديل
براك بتشوفى ياما اشبعهم من بهديل
(هنا شيخ العرب جا وقف جمبهم قال لطه
شيخ العرب: أتعبت الزمل حفيت وراك مستبقا
احسن ليك تفوت ريّه وتحل الرفقا
طه: كان كل القبائل جات علىّ منطبقا
أفوت من ريّه يا شيخ العرب ما بتبقا
شيخ العرب: البلاوى القبائل ما بسوى سواتك
خربت قبيلتك يا طه وين داواتك
تانى بحد جريك البشهدنو اخواتك
فرقت الثبات فارق درب ابواتك
ابواتك تيوباً كانوا باعون طايل
ايدن للرقاب تحجا وتعدل المايل
سيف باعك كراعك ما بتخاف قول قايل
أفو يا ود حسين فيك السؤال مو خايل
أبقى لى نسيب أحجاك وآمل روعك
وقول الدايرو فى الملك اجيك فى طوعك
من هذا الغرور يا ولدى اولى رجوعك
طه: يا شيخ العرب جربت لحسة كوعك
كل ما اوغرك فى الشينه اراك تتقدم
اتعرميت خلاص ان صبرى حسمه اتهدم
اصلو البينا ما بتنفك من غير دم
الكاينه تكون بوراك مافى ندم
( واحد جاى مع شيخ العرب -عربى- قال لطه)
العربى: أصلو الخملا ما بسمع نصيحة الهادى
اول خفنا ليك من البهادى الهادى
يا طه البهدّى الما بضرب الوادى
يمشو على الرجال ويقرن مقبل فاضى
طه: هسه وصلت الميس دحين حديد يلاقى حديد
ينبرش الطرور ويثبت الصنديد
خليه المضا لاقى البجيك جديد
(واحد برضو مع شيخ العرب قال لطه)
عربى آخر: ما بتشيل قدر يا طه انت عميت
وفى المروق وقعت عترت ما سميت
من الجاى قضيت وبقيت خلاص زول ميت
فى تركتك كفاى انا بركب اب سوميت
(اب سوميت دا جمل طه)
طه: الداير الغنى يعمل حساب لفقرو
وكعب الزله وين المتلى تكابرو
اب سوميت خلى الليله سيدكم اعقرو
وين تانى الملاج وكت يتلب صبرو
شيخ العرب: لم باقى الكلام ياطه بهمك سرّب
جيتك استعد
 
 
 
 
 
 
    رد مع اقتباس
قديم 03-19-2008, 06:35 PM   #6

امير العضيم

مشرف المنتدى العام
 
الصورة الرمزية امير العضيم

 








امير العضيم غير متصل
افتراضي

 
طه: مرحب حبابك قرب
من قومت الجهل انا للقاك مدرب
يا شيخ العرب الليله يخمل غرب
(وهنا وقع القتال ها ها ها ها..طه ضرب شيخ العرب جدعو والتفت على جماعتو قال ليهم)
طه: ترا شيخ العرب قبض الربح من تجرو
واتوسد تقيله ان شاء الله ما بتصبروا
انتو الشورة كيف عند الزمل بتحجرو
صنقعوا دا السماء بطول والله بتجرو
أحمد: ارنى يا عمر الروح فى يد الخالق
بجيها الدر فى الدرقه ساسك غالب
عمر: عاين دا الخشيم دايما تنط متشالق
ما تنزل عليه ات ماك بالق
طه: دربى صعب على وصف البوصف عازر
وفى قارب التلوج انا ما يدى دايما عازر
اسمعو يا طرش كما بجينى مبارز
واحد منكم بضرب طرف ما فارز
ترا اب سوميت اركب يا عمر سافرت
قبيل وقت الكلام من الأسد طفرت
مالو دمك بهت متل التقول جفرت
عمر: من القلب انا ليك تبت واستغفرت
طه: انا على حلف ان كان بقيتو سريه
منكم انتهى قبال تجى العصريه
جيتكم استعدو تانى مافيش نيه
( وكلهم قالوا ليها)
هادى السيوف واقعين وراك يا ريه
طه: يا خضرة المفرهد فوق جروفه نديه
على الواقع وراك انا كيف اشيل يديه
حتى ان كان كتلنى اعفى ليه الديه
دمى ومالى هيلك واقبليه هديه
ريّه: رجال التابه انتو الستره تب ما فالكم
اتأمنتم قوموا سوقوا جمالكم
حتى جمال ود دكين سوقوه يتبع مالكم
نمشى فى حالنا واتو امشو فى حالكم
(الجماعه قاموا صوف اتلفتت على ود دكين قال لريه
طه: زايله رقد دكين اسد القبيله الراعى
كما ضايقنى هو ما كنت قطتو ضراعى
ريّه: تتأسفلو ليه كان داير يجزبو الراعى
والنعلات حرام ما تضوقا تانى كراعى
( يعنى ان مات ود عمها دا للقيامه ما تلبس نعال)
طه: موت المتلو نقصان للعرب فى الجمله
كان رأس الجرارى وهو البقود الحمله
اطرف عائل يقيف ليه يقيف بعد ما يمله
كما شويه كان داير بعمل العمله
( بعدين قاموا طوالى مشو فى دربهم.. برضو يعنى فى مسيرن برضو ما شيت للمك نمر..طبعاً قبيل كانوا ماشين وحصل ما حصل..هم برضو حيكلموا الملك نمر..ساق بت عمو ولقوا المك نمر قاعد وجماعتو قاعدين جمه الجعليين واولادو قاعدين وهنا جاهم قال ليهم)
طه: التلب الذوم مدخور يفيد العائله
اقدل تمهل فوقو الحمول الهائله
اياك ميز القبائل فيك تسند المايله
فراج كربة الهم اب قبائل جايله
عامر جمعكم انشاء الله ما انفضه
ما جابنى مال ما بدور دهب ولا فضه
بدور المك نمر سيد النحاس الجدضه
جيتو علىّ حملةً غيرك ما تنقضه
المك: تقضى كان بقدره
طه: انت اللزوم ماك حاشى
الف ذى حزمتى تشيلها تقدل ماشى
التقيان تغشه والضيف بتراشى
ما داب قبيلتك النحن بيك نفاشى
جيتك واملى فيك يا مك تكشف همى
فى الأول وداعتك وفى حماك بت عمى
وقتين تقبله ات شلت تلتين همى
والتلت الأخير تحجانى تحقن دمى
بت عمى اب كبس ما كان ابوها فقير
ابوى قبال مات وربانى كنت صغير
وقت اعيش وراه مانى حقير
اصد الغارة على جارى ولعروضى اغير
المك: مالك اسح شن جاك
طه: جاتنى جنيه حربة ربى ما بخاطرى ما بنيه
المك: قتلت منو وجريت
( التفت على بت عمو قال ليها)
طه: ها ما بتسمعى يا بنيه
هدى المابيها لكن خفت ورانيه
الموت ما بخاف الخوف مو هولى
الشىء البخافو بخاف بهادل عولى
الناس الوراى كان براى يسعولى
فى راس الكتلتو اقيف يمين للحُولى
كان هم برضو بتارت ياخدو الهيلتى
ما كنت التجيت ضاقت علىّ مهيلتى
يا مك ناسى قله بخاف يخربو قبيلتى
بجعل احتميت فوقك سندت تقيلتى
الشكريه تقيو وللجوار ما براعو
حمد وودكين فى راسى خت كراعو
سمع بسفرى قاصد شندى قام فى سراع
وقاطع دربى يخرط ريه قال بضراعو
جيتك من اهلى قاصدك ما بقبل تار
انكشف الامر براك دحين اختار
آما تبقى بينى والبخافا ستار
ام تكتلنى ات نسيبو تاخد التار
اياك عز القبائل والكرم فيك طبع
وجارك ما بهم ان يسوى السبع
ان كان اجلو تمّ اخد قصاصو السبع
والليكالو الاسد اخيرلو من الضبع
(آآآ..المك نمر هنا التفت على الجعلين القاعدين جمبو قاليهم)
المك: مطارق جعل اتو الكلام سامعنو
قولو دحين رايكم وفكركم الشارعنو
(واحد جعلى تلب وقف على حيلو قال ليه)
جعلى : كان ضيفنا ما نحميه وندافع عنو
نرمى سيوفن ليه تانى الحصان ساعينو
قديم يا مك ديارنا مرتع الامال
وشعبه الكون ، ركازة الزمان ان مال
سعين من جارى العوق يمين وشمال
بدمان التنزيل نحجاه قبل المال
اديه الامان يقدل ويلقى مناه
البقى فى آمان المك منو البدناه
كل اسم جعل من اعله لادناه
محال يقرب والمك نمر ادناه
المك: انت كبارنا شورتكم ما معنى بتعمرو
مارستو الدهر ضايقين حناضلو وتمرو
قايت الحى فناه الموت نهايه امرو
لكن بوراه ذكر يصبح عمرو
اياه الضامره وعليها كنت مصمم
ما اتعداه رايكم جاى ليها متمم
صار فى امانى طه الزمام متزمزم
ادوه هدومى وبعمامتى اليكون متعمم
ارتع فى امانى انا البغش البطقو
الزمنى غرورو وللرقاق ما اعتق
بالمال الشرت عازم اباصر رتقو
وان قال لا عقبن نوسع فتقو
تقول بالأمان فوق النحاس بشربو
لامن يسمعو الناس البعاد والقربو
عقب البدنو طه يمبن عقاب نخربو
انا المك نمر كبريت يحرق الجربو
(طه طبعاً اتكيف من كلام المك نمر خلاص قال)
طه: نمراً يركب الكيك البطل اتحرن
نمراً يقلب العوقه اب صفوفن جرن
خلوات صدرة فى علوم الحروب كم قرن
سيفو بنسرف الدرع الحديد مقرن
مو متل الشجر حاضن فروعو مقيل
دا النمر البضاير الصف محل ما يميل
كل ما اقول شكر القاه فيه قليل
كفو بيخجل العين اب سحابه ميل
غابة المك قبيلة ما تخطى اصولا
العشمان يعيش فوق ضلها ومحصولا
بالشينه البدوره بعيد عليه وصولا
فروعه سيوفه ومطارق جعل فى اصولا
عرمان جدكم النسبه عباسيه
وايان فضلكم لليله ما منسيه
هاهى الدنيا حيه بفخركم مكسيه
نزيلكم ما بهم ان سوى الف سيئه
من سابقه العرب فى اصلها وفخوره
مثبوت الرجاله وعندكم ماخوزه
صغيركم يدخل الحارة ميوس يخوده
مجرب من قديم سيفكم بوابر الخوده
(واحد حاجب كان قاعد جم نمر قال)
الحاجب: نبه بالامان فرسان فازن وهزت
دقين النحاس فوق الرجال انعزت
عروس الكُجرة فرحانه وطرب اهتزت
عرمان عزُّ لله قبيله بيك اعتزت
المك: وصلو طه للبيت المخصص ليه
واحفظ كل موجودو وجميع ماليه
خدمتك باحسن تقعد معاهو تسليه
فى كل يوم تعيت ناس يغفر عليه
طه: عشمكم
المك: ابدى بنصايحك وبيها أخير انصحنا
واختم بالحماس بالفيها قولىّ نحن
النصيح: خلى عجب النفس الدنيا قيد قصير
وبشرك اصيحو لا تكون دوام متغير
لا يغيرك هوا الضُحى المتغير
كم سبق الاجل خلا الامل متحير
 
 
 
 
 
 
    رد مع اقتباس
قديم 03-19-2008, 06:39 PM   #7

امير العضيم

مشرف المنتدى العام
 
الصورة الرمزية امير العضيم

 








امير العضيم غير متصل
افتراضي

 
اها ياصفوة قصرت معااااك مالقيته بالصوت جبت ليك الرواية الاصلية
 
 
 
 
 
 
    رد مع اقتباس
قديم 03-23-2008, 03:24 PM   #8

الفنوب

خبير
 
الصورة الرمزية الفنوب

 








الفنوب غير متصل
افتراضي

 
والله ما قصرت يا أمير لكن أنا لقيتها كدا في أكتر من موقع ،،، بس أنا دايرها مسموعة عشان أنزلها في الموبايل لو أمكن
 
 
 
 
 
 
    رد مع اقتباس
قديم 05-16-2008, 01:39 AM   #9

مجتبي كرار

العضو الذهبي
 
الصورة الرمزية مجتبي كرار

 








مجتبي كرار غير متصل
افتراضي

 
امير
لك التقدير والتحية
عمل مقدر وبذلت فيه مجهود كبير
ربنا يديك العافية
انا فعلا ابحث عن هذه القصة مسموعة زي ما قال الفنوب
 
 
 
 
 
 
التوقيع

C:\Documents and Settings\zin\My Documents\My Pictures\666.jpg

    رد مع اقتباس
قديم 05-16-2008, 01:50 AM   #10

امير العضيم

مشرف المنتدى العام
 
الصورة الرمزية امير العضيم

 








امير العضيم غير متصل
افتراضي

 
مازال البحث جــــــــــــــــــاري ياشباب
 
 
 
 
 
 
    رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

Facebook Comments by: ABDU_GO - شركة الإبداع الرقمية
Preview on Feedage: -%D9%85%D9%86%D8%AA%D8%AF%D9%8A%D8%A7%D8%AA-%D8%B4%D8%A8%D9%83%D8%A9-%D8%A8%D8%B1%D8%A8%D8%B1- Add to My Yahoo! Add to Google! Add to AOL! Add to MSN
Subscribe in NewsGator Online Add to Netvibes Subscribe in Pakeflakes Subscribe in Bloglines Add to Alesti RSS Reader
Add to Feedage.com Groups Add to Windows Live iPing-it Add to Feedage RSS Alerts Add To Fwicki
Add to Spoken to You
Feedage Grade C rated

Google

Powered by vBulletin® Copyright ©2000 - 2014, Jelsoft Enterprises Ltd. BrBrNeT
F.T.G.Y 3.0 BY: D-sAb.NeT © 2011
كل المواضيع والمشاركات المنشورة في منتديات شبكة بربر تمثل وجهة نظر كاتبيها ولا تمثل بالضرورة رأي شبـــــكة بربر
اخر المواضيع

دعوة زواج العضو كوم اللوم @ معايدة @ قوات امن ومطاردة وإعتقالات. @ عيد سعيد.. من عواده. @ عيد سعيد وكل عام وانتم بخير @ خلاص ارتحت منّك..... @ الي اصحاب القلوب الرحيمة والايادي البيضاء الطالب محمد يناشدكم @ امطار غزيرة تجتاح مدينة بربر وضواحيها @ جوالى --موبايلى --سيلفونى--هاتفى المتحرك @ دورة برنامج الإنشطار البيعى والتفاعل المتسلسل للتسويق المباشر ( من شركة بروتيك لحلول @


 شبكة بربر

Google Adsense Privacy Policy |