السودان الوطن الواحد
شبكة بربر

الرئيسية أضفنا للمفضلة روائع منتديات شبكة بربر أجعل شبكة بربر صفحة البداية ملخص قرارات الإدارة الاتصال بالادارة
 ما شاء الله تبارك الله ما شاء الله لا قوة إلا بالله ، اللهم إني أسالك الهدى والتقى والعفاف والغنى

قوانين وضوابط المشاركة في المنتدى تفعيل العضوية طلب كود تفعيل العضوية استعادة كلمة المرور التسجيل

قـوقـل: شـبـكـة بـربـر أكـبر مـوقـع لـتـجـمـع الـشـباب الـسـوداني والمـواضـيـع الــهـادفـــة

إذاعة محلية بربر المجتمعية

قديم 07-11-2015, 11:47 PM   #1

مشرف إداري
 
الصورة الرمزية هيثم حاج على

 









هيثم حاج على غير متصل
Thumbs up رواية السحر القاتل لـ طارق اللبيب

 
رواية السحر القاتل .
الحلقة الاولى
بقلم طارق اللبيب .
...........................................

اتوقى بي توب الحذر.
بي قوالة .لاتظلم بشر.
وكتين تكون سامع كلام.
ويكون كلام قاسي وخطر.
ابعد من الشــك والظنون.
واتحرى من اصل الخبر.
.
اصلا مافي حاجة في الدنيا دي .. بتحصل الا بي سبب .. ومسبب الاسباب هو رب السماوات والارض .. وفي كتير كلام بتكون سامعو . بتكون محتاج لي تأكيد . لي شي تشوفو بي عينك .
وحتى مرات البتشوفو قدامك . قد يكون في جانب غايب عليك . يعني لو جات قدامك غنماية بيضاء ماشة .. انت بتقول جات قدامي غنماية بيضا.. لكن برضو المفروض ماتكون متأكد من انها بيضاء ..
احتمال تكون بيضاء وسوداء .. يعني لونها بالجيهة العليك ابيض والجيهة التانية الانت ماشايفها تكون سودا .. عشان كدا مافي زول يدعي الاحاطة بي كل شي .. ويكون متأكد من كل شي .. وما تحكم بمجرد معرفتك القاصرة .. حتى تتاكد من جوانب الاشياء ..
والنظر من عدة زوايا ..
كان في قاضي من قضاة المسلمين في الزمن السابق . جاهو واحد عينو مفقوعة .. قال ليهو يامولانا القاضي . في واحد اسمو فلان الفلاني فقع عيني واهدي عيني مفقوعة .. القاضي قال ليهو مابحكم ليك الا اسمع منو .. الجماعة القاعدين قالو ليهو يا مولانا القاضي .. الزول عينو مفقوعة قدامك .. انت داير تتاكد من شنو تاني؟ .. قال ليهم لغاية ما اشوف المتهم .. احتمال عينيهو الاتنين مفقوعات ..
المهم انو الزول يتأكد .. من المنقولات .. قبل مايبدا في اطلاق الاحكام والتصرف ..
في واحد اسمو عوض ود الضريس . راكب في البص السياحي .. من الخرطوم ماشي على مدينة ود مدني .. مدينة الجمال والحنية .. عوض بتونس مع واحد راكب جمبو في البص ..
وكل مرة عوض يعاين للزول ده .. هم الاتنين اعمارهم قريبة بعض
في نهاية العشرينات .
كل مرة يديهو نظره لغاية ما الزول اتعقد ..
قام عوض قال ليهو كيف الاحوال؟ .. معليش معاك .اخوك عوض الحاج. بقولو لي ود الضريس . ده اسم انقيب حق ابوي ..(لقب) ..
ممكن نتعرف عليك؟.. لانو وشك ده ماغريب علي ..
قال ليهو ابدا والله ماحصل اتلاقينا.. لكن ما مشكلة نتعرف معاك..
انا شايفك من قبيل بتعاين لي انا ذاتي قلت الاتكون مشبهني .
انا اخوك صلاح حمد من مدني .
عوض قال ليهو اصلا من مدني ولاساكنين هنا ساي ؟
قال ليهو والله اصلا" اهلنا من نهر النيل.. لكن جو بدري واستوطنو في البلد دي .. والبلد دي احتضنتهم وقعدو ..وانقطعو من البلد ديك .. والله هسي انا بالذات بلدنا ماشفتها ..
قال ليهو والله يهودا الحاصل علينا كلنا .. عارف ياصلاح اخوي ابواتنا ديل ..عندهم حقوق وطين .. في الشمالية ونهر النيل . وكت تجي مشاكل الوراثات .. بفوتو يخلو حقهم لي اخوانهم ..عشان الواحد يشتري اخوانو بالزايلة ..
لانهم كان قعدو واتناكفو في الواطة .. الخوة بتخرب ..
عارف ياصلاح .. انا واحد من تلات اخوان .. ابونا . اتنازل لي اخوانو من تركة ابوه وجا الخرطوم وهو شاب.. وجا اشتغل بي ضراعو.. واتزوج من توتي .. وسكن امدرمان . ونحن مولودين في امدرمان.. لكن اصلا ابوي ما انقطع من البلد .. اي فرح اي كرهـ
بسافر يمشي البلد ..يعدي يومين بالكتير.. وبجي راجع .. ونحن هنا ابوي ربطنا بي اهلنا .. وبقينا نعرف اولاد اعمامنا الساكنين هنا ..واي زول عندو علاقة بالاسرة في الخرطوم.. نحن بنعرفو وبنجاملو في اي مناسبة ..
صلاح قال ليهو طيب هسي انت جاي مدني لشنو ..ونازل وين ..؟؟
ما ترح تنزل معانا.. نكرم مثواك بواجب الضيافة ؟؟
عوض قال ليهو والله انا عندي خالي هنا ..في مدني ..عيان ضاربو يرغان ..
وعندو اطفال صغار.. وشغلو في يدو ..عندوقدرة فول في السوق .. انا كنت معاهو قبل سنة .. عديت لي معاهو كم شهر كدي ..شغال معاهو .. وهسع ضرب تلفون ..قال عوض يجي يمسك القدرة ..عشان انا عيان ..
اصلا ياصلاح ..انا قاعد في ام درمان لافي زي الاهبل.. شغل ساي مالاقيهو .. وابوي كل يوم ينقنق .. والشهادة ماجابت شي .. والشغل في اي محل بقى مابغطى معاك حق مصاريفك ومواصلاتك .. والله جربت اي حاجة .. بنيان نقاشة كهربجي .. اشتغلت تحميل في شركات .. اشتغلت مراسلة .. ماخليت شغلة ما اشتغلتها ..قلنا كدي نشوف مدنيكم دي.. احتمال نلقى فيها المنى ..
صلاح قال ليهو والله ياخي مدني حنينة.. واي زول بجيها مابرجع منها قمحان .. دحين انت مادام داير تشتغل في السوق في محل خالك .. بتاخد فكرة كافية عن السوق.. والوضع هنا عامل كيف .. وانا متأكد انك حتى بعد خالك يبقى كويس.. ويمسك شغلو..انت بتلقى ليك شغل كويس هنا ويغطي معاك ..
عوض قال ليهو قول يارب .. قال ليهو يارب ياكريم تتوفق ..
عوض قال ليهو .. انتو ساكن وين في مدني .. ؟؟
صلاح قاليهو نحن ساكنين في عووضة .. قال ليهو بعرفا كويس مشيت ليها كتير .. انا خالي ساكن في حي جزيرة الفيل .. منطقة عجيبة وجميلة بالرغم من انها حي في مدينة لكن والله تذكرك القرية في الحنية والتواصل والمحبة البين الناس ..
انا قعدت مع خالي السر فترة اتعرفت مع الناس وبقى عندي اصحاب بالرغم من اني بجي راجع من السوق المساء ..
اصلا خالي بشتغل فطور بس الساعة 12 بكون خلص اي حاجة بحصل صلاة الضهر في البيت .. تاني بجي راجع المساء يشد القدرة
وانا برجع معاهو ..
انا متعود على الحوامة اللدهي تلقاني حايم السوق ده بكراع كلب
وماخليت ناس ماعرفتهم ..
اولاد خالي 4 تلات اولاد وبت . البت الكبيرة بتقرا في العالي والاولاد صغار تامن وسادس ورابع ولاتالت ماعارف .. المهم شفع يعني . هسي بي مرضو ده تلقاهو اتردم ديون المسكين ..
الناس ديل يتونسو الاتنين ويحكو والبص ماشي وقزازو مقفل وصوت المكيفات ده شغال اشششش ..
وصلاح فتح في الونسة مع عوض وبتكلمو عن القرى على القري العلي يمين الزلط وشمال الزلط ..
دي الدوينيب ودي العيكورة ودي فداسي ودي شنو وشنو المهم يازول الناس ديل اتعرفو بي بعض تعرف لصيق وكل واحد شال تلفون التاني ..
اصلا عوض ده زول ايجابي شديد وبخش في الناس بي سرعة وبتعرف على الناس وزول اجتماعي لدرجة ..
في اي محل يمشي ليهو بعمل ليهو اصحاب ..
وكتير جدا بتعرض لمواقف بتاعة احراج بي دخوله في الناس .. ومرات بنحشر في مواضيع ماعندو بيها اي شغلة .. بعمل فيها مصلح اجتماعي هه ..وبلاقي احراجات .. وصدمات من الناس لكن هو زول بالو واسع ومابزعل بي سرعة ..
المهم يازول البص وصل مدني والناس نزلت . وعوض وصلاح اتوادعو .. واتواعدو انهم يتلاقو ان شاء الله ..
وعوض شايل ليهو شنطة فيها هدومو ولوازمو .. وكيس فيهو فيهو هدايا ولعبات .. يفرح بيها اولاد خالو الصغار .. وتوب وشبشب مرسلاهن امه لي مرة فهيمة مرة خالو ..
اها يازول وصل البيت في جزيرة الفيل .. ووقف الركشة قدام الباب .. والساعة كانت قريب 2 .. والاولاد جو برة ..وقعدو يكوركو
عوض جا عوض جا .. الجماعة الفي البيت جوة استبشرو .. والسر خالو اخو امه فرح بي جيتو شديد ..
ودخل ورحبو بيهو وفعلا لقا السر عيان وعيونو ديل صفر شديد .. وشفايفو ولسانو .. وعليهو اثر بتاع كوي في يديهو تحت الابهام طوالي ..
قال ليهو والله ياعوض جيتك دي فرحتني فرحة .. لامن حسيت بي نفسي بقيت كويس وحيلي شداني ..
عوض قال ليهو يعني اسافر بكرة طوالي هههه .. والبيت كلو ضحك
قال ليهو لالا ياخي انا قاصد اني فرحت نفسيا بي جيتك .. انا تعبان ياعوض ياولدي .. والله قبل يويمن ماقلت بصبح للصباح من الاستفراغ والهبوط .. غايتو امس الصباح مشيت لي زول كواني شوية الليلة حسيت بي روحي احسن ..
والله ياولدي الزول وكت يكون في منطقة وهو غريب فيها ومافي زول من لحمك ودمك .. بتشعر فعلا بالخوف .. والله انا مارسلت ليك عشان الشغل ووبس .. انا لاني خفت من المجهول اموت في البلد دي .. ومافي زول في راسي ساي ..
قال ليهو ماتقول كدي ياخال .. ان شاء الله بعد عمر طويل ..
فهيمة جات شايلة ليها عصير لي عوض وبتنقنق .. والله ياعوض ياولدي خالك ده اظنو اتوهم ليهو كم يوم ماعندو سيرة غير الموت
التقول بالله هو اول زول يمرض ..
المهم كملو ونستهم ديك وعوض اطمن على خالو والعصر مرق على شباب الحلة واصحابو الزمان يسلم عليهم ..
وجا راجع قريب المغرب لقى خالو تعبان جدا وكارباهو حمى لدرجة غريبة ..
وجسمو منحل .. والمراة قاعدة جمبو وتبكي .. وبتحنس فيهو عليك الله يا السر النوديك الدكتور ..
وهو بقول ليها لا دكتور ولاغيرو .. انتي براك شفتي الدكتور قال لي ده اخر علاج ليك .. والسر المسكين بتكلم بي اخر نفس ..
عوض قال ليهو لالا مابنسمع كلامك.. لازم نقوم نوديك انت تعبان ياخال .. وهو وكت الكلام كتر عليهو بقى يعاين بعيونو .. وفجأة سحب عيونو زي البعاين في السقف ..
بتكلمو معاهو كدي كضم وتاني بقى مابرد ..
الى اللقاء .

ساعد في نشر شبكة بربر والارتقاء بها عبر مشاركة رأيك في الفيس بوك

 
 
 
 
 
 
التوقيع

نقره لعرض الصورة في صفحة مستقلة
نقره لعرض الصورة في صفحة مستقلة

    رد مع اقتباس
قديم 07-11-2015, 11:48 PM   #2

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل .
الحلقة 2
طارق اللبيب .
.....
طبعا المراة خلاس دايرة تكورك .. وعوض قال لها اوعك تفتحي خشمك اصبري .. بتكون غيبوبة ساي.. وبقى يرشرش فيهو بالموية .. ويقرا ليهو في الايات .. وقرايتو ذاتها مربوكه وملخبطة .. قال لي فهيمة عليك الله يافهيمة .. جيبي لي موية تاني .. دخلت ومرقت .. وجرت جاي.. وجرت جاي .. فتحت التلاجة . لقت باقي عصير من القبيل عملتو لي عوض .. وعوض شال منها الكباية وبقى يقطر ليهو في خشمو .. بعد شوية الراجل بقى يتمطق .. واتحرك .. ورمش عيونو .. وبلع ريقو ..
عوض قال ليها شايفة؟؟ بس عندو هبوط في السكر.. انا من قبيل.. من وقتو البقول لي بحس بي هبوط .. عرفت بكون عندو سكري ..خالي ده عندو مشكلة سكري.. وهو ماعارفها ..
اها غايتو سقوهو باقي العصير داك ..
وكلها عشرة دقايق ربع ساعة.. والسر قعد على حيلو .. فهيمة بقت تتكلم معاهو .. انت يا السر عندك سكري وماعارفو ؟
قال ليها سكري شنو يا مراة؟ انتي الليلة ماياكي؟ ..
قالت ليهو كويس.. شد حيلك شوية وامشي افحص .. براك بتعرف
عوض قال ليهو والله احتمال كبير ياخال.. لانو انت جاتك غيبوبة عديل كدا .. ايمكن خمسة دقايق انت مسحب ..
لامن سقيناك عصير حتى فتحت عينيك ..
قال ليهم وينا سهام ؟ سهام دي بتو .. فهيمة قالت ليهو مشت تذاكر مع صاحباتها .. جات من المدرسة.. واتغدت ولا ارتاحت كتير.. غيرت وطلعت طوالي . انت كنت نايم ..
والشفع طبعا قاعدين في الاوضة التانية ديك مشغلين توم اندجري وما مدركين حتى تعب ابوهم ..
المهم يازول لغاية المساء كدي السر بقى احسن كتير.. ربنا يواليهو بالعافية .. وعوض قال ليهو يا خال انا بمشي السوق . اشد القدرة . وباكر ادور شغل ..
قال ليهو مافي مشكلة شيل المفتاح .. وانت عارف محل الفول الفحم وكلو شي .. يلا ربنا يوفقك .. انا ان شاء الله كلها يومين تلاتة ..
وبقوم على حيلي..

المهم يازول عوض بعد اطمأن عليهو شوية .. وشال المسلتزمات ومشي على السوق .. والدكان طبعا" ليهو قريب العشرة يوم ما فتح .. عوض في الشارع كحل ليهو ركشة فيها بنات ..
عاين ليهم كدا .. وركز وقال براحة كدا .. أكان ما خاف الكضب.. واحدة فيهم سهام بت خالي السر .. لانو شبها ما بروح علي نهائي .. ايوة انا لي سنة ماشفتها.. وهسي من جيت مالاقيتها .. لكن اتخيل لي ياها تب .. بس المشكلة الواطه بالليل والحتة ماواضحة شديد ..
طيب البت دي البوديها في الشوارع البعيدة من الحلة دي شنو؟
موش قالت ماشة تذاكر مع صاحباتها .. الكلام ده كان قبل اذان العشاء..
وما انشغل بالموضوع ده كتير .. اي نعم عمل ليهو زنة في راسه لي بعض الوقت .. لكن واصل ومشي الدكان .. وغسل الفول وولع الفحم وقج القدرة غايتو..
ولفا في السوق شوية كدا وشرب ليهو شاي . وجا راجع ..
جا قريب الساعة عشرة .. ولقا خالو كويس ماعندو عوجة تب . وقال ليهو ياعوض انا باكر بمشي لمستشفى الشرطة عندي صاحبأ لي هناك .. يعملو لي فحوصات كاملة .
لاني فعلا .. زي ماقلتو انتو احتمال يكون عندي سكري .. لانو حيلي ده قاعد يموت .. وببول كتير .. وريقي بنشف.. وبعطش من الهينة للقاسية .. بس والله كنت مستبعد حكاية السكري دي ..
عوض قال ليهو عادي ياخال .. السكري بقى من افراد المجتمع .. اسمو المرض الصديق .. بس انت تحافظ وتعمل حسابك .. كدي انت امشي اول افحص .. لانو لسه مامعروف ..
واصلا عوض ماحاول يكلم ابو البت .. يقول ليهو لاقيت البت في الحتة الفلانية ..
شكلة عايز يتأكد بي طريقتو ..
بعد شوية عوض قال لي فهيمة .. وين سهام يافهيمة لسع ماجات من المذاكرة ؟ داير اسلم عليها ..
قالت ليهو لا لا والله ماجات ..لكن خلاص بعد ده بتجي.. بجن صاحباتها يجيبنها لاغاية الباب كل يوم وبرجعن .. البت ممتحنة ياولدى.. وباكر بعد باكر بتكون في الجامعة ..
غايتو انا سهام بتي لاهسع شايفاها شافعة .. وما ها قدر الدراسة الجامعية ..
اها ختو العشاء .. وفي اثناء ماعوض قاعد يتعشى مع خالو ..وخالو طبعا" بياكل حاجات معينة.. وممنوع من حاجات .. عشان اليرغان وكدا ..
الباب دق.. فهيمة مشت تفتح الباب .. لقتهم ديل ناس سهام وصاحباتها يادوب جن .. عوض عاين لي سهام كدا.. من جوة الاوضه . لقاها لابسة نفس البلوزة الشافها في الرقشة ..نفس اللون والتشجيرة ..
ياودوب الشك بدا يدب في قلبو ..لكن برضو سكت .. قال ياخي مافي داعي للفتن ..هسع انا جيت يادوب اقعد افتن البت في ابوها .. والراجل عيان .. وعندو سكري شكلو.. لالا ما من المصلحة اتلكم هسي ابدا ..
بعد العشاء جات سلمت على ود عمتها ..والموضوع مشى طبيعي ..
بس في ناموسة في قلب عوض ود الضريس .. ضد البت الاسمها سهام دي. ..
والايام مرت.. وعوض شغال في السوق في محل الفول بتاع خالو . والشعل ماشي كويس .. وكل يوم بجيب ليهو الايراد بتاع المحل .. الله يجعل البركه .. والخال طبعا فحص ولقى عندو السكري..
وهسي اليومين ديل راقد في اللبيت .. وعوض في السوق ..حلووو ؟
في يوم من الايام بعد ماعوض خلص الشغل..
ومشى على صاحبو بتاع صالون حلاقة في اخر السوق.. بمشي كتير بتونس معاهو ..
وفي بت بتعمل جبنة كدا مزبوطة .. في النيمة القدام الصالون.. بشرب عندها ..الجبنة وبقعد يهظر معاها .. ويكاويها ..
الكلام ده كان زي الساعة واحدة الا شوية ..
هو داخل على الصالون بتاع الحلاقة كدا .. عينو من بعيد تقع فوق ولد وبت.. قاعدين في ضل حيطة .. متقابلين ومتجيهين على الجيهة الشمال .. وشكلهم بتكلمو عن موضوع .. والبت مدنقرة وبتتكلم ..
بعد شوية البت رفعت راسها .. يلقاها ليك دي سهام بت خالو السر .. وراسو ضرب.. وجسمو ده كلو رجف . ودمو بقى يغلى في عروقو.. شوف بالله البت دي .. قبل ايام انا شفتها راكبة الركشة بالليل .. وهسي الليلة قاعدة تتونس مع الولد في نص السوق ..
البت دي خلي بالك .. ح تعمل فضيخة لابوها .. وتسود وشو في نص الرجال انا لازم اتصرف ..
طوالي جا ماشي عليها .. من هناك ..
قال ليها سهام؟؟ .. وكت شافتو . انزعجت.. . بس عملت فيها عادية .. وقالت ليهو دقيقة يا عوض جاياك .. وبقت مواصلة في كلامها مع الولد .. وفي نفس قعدتها .. دايرة تعمل الموضوع طبيعي ..
والولد رفع راسو كدا عاين لي عوض معاينة طبيعية.. مافي اي استغراب .. وعوض واقف منتظرها .. قال ليها يابت قومي تعالي بتكلم معاك .. قامت جات ..
سهام ما اكتر 17 سنة ..وبت جميلة حسناء لحد بعيد.. ويادوبها طبعا في طور التكوين الطبيعي للمراة ..
وعوض اكبر منها بي عشرة سنوات تقريبا .. وكت جاتو ماشة بي كل ثقة ..وشايفة نفسها ماعاملة اي شي ..
وعوض دمو من جوة يغلي ..وكت وقفت قدامو.. كان مو شايفها شينة ..كان داير يرشها كف في نص السوق ..
قال ليها ده منو. يا سهام؟؟ وعلاقتك بيهو شنو؟ والبقعدك معاهو في السوق شنو؟ وجيتي كيف هنا؟؟ .. ومدرستك بعيدة من هنا؟؟ ..
جاوبيني على الاسئلة دي سريع ..قبل ما ارشك بونية هسي افرتك ليك حنكاتك ..
قالت ليهو اهدا.. اهدا ياعوض .. انا من شفتك من بعيد اتأكدت انك ح تظن بي الطن الكعب . لكن والله انا ماغلطانة .. الزول ده اسمو يوسف . وهو حبيب صاحبتي . وهم مختلفين وهي بتحبو شديد .. وعندو معاها مشكلة.. وهسي متقاطعين ..ومن يومو القاطعها .. هي عيانة . ومنهارة ولا قادرة تاكل ولاقادرة تشرب لاقادرة تقرا .. وهسي انا جيت مخصوص معاي صاحبتي التانية .. عشان نلاقيهو هنا ..ونسأله من سبب المشكلة ..ونشوف لو في طريقة نرجعهم لي بعض .. لانو والله صحبتي حالتها تحنن ..
طوالي عوض صدقها .. والزعل الجواهو كلو راح .. وقال ليها الله يجزيك خير طيب .. طيب انتي كان تكلمي امك او ابوك ..بالموضوع ده وتخليهم في الصورة ..
قالت ليهو انت عارف خالك يا عوض ..صعب كيف ..ومابفهمني اصلو ..
عليك الله الكلام ماتقولو ليهو.. هو مابقدر يتفهم الامور زيك .. انت زول واعي وبتفهمني .. قال ليها وهسي اتوصلتي معاهو لشنو الزول ده ؟
قالت ليهو والله هو جايبين ليهو فيها كلام ..وشكلو هو مصدق الكلام ..
وانا هسي لمن بقول ليهو الكلام ده كذب .. بقول لي انتي عشان صاحبتها ..دايرة تبرري ليها اي حاجة .. وتتستري عليها ..
عوض عاين كدا للولد لقاهو فات مشى ..
قال ليها خلي صاحبتك تحل مشكلتها بطريقتها.. اتحركي طوالي امشي علي البيت .. وينها البت الجات معاك؟؟ ..
قالت ليهو مشت البوتيك القدام داك.. انا بغشاها وبنمشي البيت.. انت ماتشيل هم .. امشي مشوارك انا بصل ..
وهو طبعا صدقها برضو.. ومشى على الصالون .. ولاشاف البت الجات معاها دي منو .. سهام كانت بتتكلم بي ثقة وثبات عجيبة.. اي زول يسمعها بصدقها طوالي ..
المهم هو مشى اخد قعدتو مع صاحبو بتاع الصالون الاسمو اسامه ده .. وعوض فكرو برضو مشغول بالمموضوع ده .. اتاريهو اسامه وهو بحلق شاف عوض وكت بتكلم مع سهام ..
قام سألو قال ليهو .. البت دي بتعرفها من وين ياعوض؟
طبعا" عوض اتخلع معناها البت دي مشهورة ...لدرجة بتاع الصالون بعرفها ..
عوض قال ليهو انت بتعرفها يا اسامه ؟؟
..........الى اللقاء ...........
 
 
 
 
 
 
    رد مع اقتباس
قديم 07-11-2015, 11:49 PM   #3

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل .
الحلقة 3
طارق اللبيب ..
........
اسامة الحلاق قال ليهو لالا .. مابعرفها بس قبل شوية كانت قاعدة مع عشة (ست الشاي) فوق البنبر ده ..مسافة طويلة . وانا جيت قعدت مخصوص عشان اتشمر .. وعملت داير اشرب شاي .. سلمت عليها.. ردت السلام ..قلت ليها انتي منتظرة زول؟
قالت لي ايوة .. قلت ليها طيب.. قعدتك دي شينة هنا .. خشي على الصالون جوة .. قالت لي لو دخلت جوة كان جا مابعرف مكاني .. قلت ليها ماعندك ليهو تلفون ؟ قالت لي تلفونو قفل قبل شوية ..
المهم بعد شوية جاها زولها ..وساقها مشا بيها هناك .. لكن والله دامة زي الدامة .. عوض قال ليهو ماكان معاها بت تاني؟
قال ليهو والله ياعوض ماشفت لي بت غيرها ..
عوض ابا يقول ليهو دي بت خالي .. سكت ساي ..وقلبو ولع نار من جوة .. غيرة الرجل السوداني على عرضو ..
وعارف لو قال ليهو دي بت خالي ..ح يتحرج ويقعد يعتذر .. قال انسا.
عوض عدى قعدتو مع اسامة الحلاق ..ومشى ..واسامة لاحظ ليهو كل مرة يسرح.. صراحة عوض بقى مشغول بي موضوع سهام .. وباقي بين امرين..
يسكت ويستر البت عشان مايسبب مشكلة في البيت ..
ولا يكلم ابوها ويخليهو في الصورة قبل الفاس ماتقع في الراس . لانو الخال وضعو الصحي لايستحمل الصدمات القوية ..
عوض كان محتاج لاي دليل يثبت بيهو تورط البت في علاقات غير سوية ..عشان يتصرف معاها .. لانو هسي بقى مشكك وبس .. والشكوك كبيرة شديد ..
اخيرا خطرت ليهو فكرة عجيبة وغريبة .. طلع تلفونو وفتح الاسماء ..وطلع اسم صلاح حمد .. ده الزول الاتعرف عليهو في البص ..
اتصل عليهو وداك رد .. ود الضريس؟؟ حبابك والله نورت الشاشة .. وين يازول ؟
عوض قال ليهو والله مقصر معاك.. المفروض اتصل عليك طوالي.. لكن والله خالي تعب تعب شديد.. وهسي انا مدروش في السوق درش غريب ..
صلاح قال ليهو اها هسي ان شاء الله خالك ملك الصحة؟ ..
قال ليهو والله لسه راقد ..واخيرا كمان ضربو سكري.. ده الكان ناقص ..
اها دايرين نتلاقى ياخي .. ياتجيني يا اجيك ..بس شوف الكويس معاك ..
صلاح قال تعال لي انت .. والله يكون لي الشرف .. وتاني انا بجيك ..
عوض قال ليهو كويس وصف لي البيت ..
ووريني أجيك متين ..
قال ليهو طيب بتعرف مارنجان عووضة كويس؟ . قاليهو بعرفها ..
قاليهو شفت جامع انصار السنة؟ .. جوارو طوالي في مدرسة اساس . قدامها نادي .. اسمو نادي الحي الغربي ..البيوت البعد النادي ده.
تسأل اي زول لاف .. تقول ليهو داير بيت ناس صلاح فرتاق .. بتكون وصلت .. قال ليهو يازول باكر بتغدى معاك تب ..
قال ليهو حبابك والله ياعوض.. تشرف والله ..مرحب مرحب ...
طيب في امان الله في امان الله.. وقفل التلفون ..
بس الظاهر انو عوض عندو هدف كبير من الزيارة دي.. والتواصل ده .. مع انو هو زول هاوي تواصل لكن دي براها ..
المهم جاء راجع البيت .. وبقى يعاين لي سهام اتنين اتنين .. وكاجيها كجة .. شايفها قبيل غشت عليهو .. وهي بتعاين ليهو والخوف ظاهر في عيونها ..خايفة انو يكلم ابوها .. لكن عوض زول صميم.. وزول مواقف ..سكت ساي ..لكن بعاين ليها معاينة حقارة .. وما اتكلم معاها اصلو ..
بس في حاجة.. امها فهيمة مرة لبقة وفهيمة فعلا" ونقاشة..
لاحظت للنظرات المتكررة من عوض لسهام .. ولاحظت لارتباك سهام ..
انفردت بيها وقالت ليها انتي يا سهام.. عوض ده بعاين ليك كدي مالو ..؟ قهرتو بي الله يا يمة.. انا باقي بخاف من العين ..
قالت ليها مافي شي يا امي.. انتي مالك بتتوهمي كدا؟؟ عوض طيب وجنين . ومرات بعاين في حتة.. وبكون بالو في حتة تانية .. انتي بدل ما تعطفي عليهو..هو جاي عشان بساعد ابوي.. تقعدي تقولي قهرتو بي الله؟ غايتو انتي يا امي مشكتك مستعصية ..
وسهام بتدافع عن عوض..وفهيمة تعاين ليها وتتبسم ..
وهي ماعارفه انو سهام بقت متضايقة من مجرد وجود..عوض معاهم .. لانو بقى مسبب ليها هاجس ومخاوف ..
وهي ماعارفة المصيبة الماشة عليها .. وبكرة تتكشف الحقايق ويبين المستور ..
اها بكرة اليوم الموعود مع الود صلاح .. عوض مشى السوق وجهز الفول ونزل طاولات العيش .. وبقى شغال بي مزاج ويصفر في اغنية الكاشف البتقول .. ياحبيبي قلبي حاب.. رحلة بين طيات السحاب ..
وببيع بي سرعة.. كف كف .. ويتونس مع ده ويهظر مع ده .. مشغل معاهو ولد من اولاد مايو 40 ..
ولي متين يخلص من البرنامج ده ..عشان يمشي لي صلاح فرتاق ..
انتهى زي الساعة 12 الا شوية كدا ..وقعد يكسر في الزمن لامن صلى الضهر وركب مشى ..
وصل لي بيت ناس صلاح ..على حسب الوصف .. صلاح زول مشهور اي زول بعرفو ..
اها يازول صلاح والله راجل ضو قبيلة.. وصباح خير.. رحب بي عوض ترحيب اهلو الاصليين ..وفرح بيهو فرحة ظهرت فوق وشو ..
قعدو اتونسو شوية كدي.. وجابو الصينية الماخمج .. واتغدو فضلة خيركم .. وحلو وشربو الشاي.. والونسة والضحك ماخلو نكتة مساطيل ماقالوها ..
حتى حكو النكتة المسطول الطلع الصالون وفرا جانحيهو.. وجا ناطي من راس الصالون ..
قايل نفسو صقر .. وكت بقى في نص الهواء .. لقى الاجنحة بلا ريش .. وتاااخ دقه الدلجة ههههه ..
صلاح كان معاهو اخوه الاصغر اسمو ايوب ..
واحد من الجيران صاحب اخوه.. بس الاربعة ..
المهم .. بعد شوية الاولاد الاتنين اتخارجو ..وفضلو صلاح وعوض الاتنين وبحكو لي بعض ..
عوض قال ليهو.. والله ياصلاح ..موش ده لقاءنا التاني يادوب؟ .. والله التقول بعرفك قبال عشرين سنة .. ياخي والله اصحابي كلهم مافيهم زول ارتحت ليهو كدا ( ياربي المقدمة دي حقيقة وللا حنك ساي؟ )
صلاح قال ليهو والله نفس الاحساس ياعوض.. ياخي ربنا يكرمك زي ما اكرمتنا بالجية دي ..
عليك الله قلت لي كيف خالك السر؟؟ ..
قال ليهو والله ياخي خالي السر . غير المرض . المرض هين ..هسي عندو مشكلة كبيرة ..وهو مو عارفها .. عارفها انا وبس .. ومافي زول بقدر يحلها غيرك انت ..
صلاح كان شايل الجك والكوز.. براحة ختاهن في الطربيزة .. وقعد براحة .. وقال ليهو .. انا؟؟؟
والله اذا كانت في مقدرتي.. لو بي دمي احلها ليهو.. بس انت قول لي .. ..
عوض قال ليهو عارفك راجل وود رجال.. ومابتخيب ظني ..
عارف ياصلاح ..السر خالي عندو بتو ..في طور صعب وحرج جدا ..بتقرا في العالي ممتحنة .. وانا خايف عليها شديد .. لانو السر زول درويش وطيب وبرئ .. ومابنتبه لي كتير من الحاجات.. والبت دي انا ملاحظ عليها .. عدم اتزان .. وماعندي عليها بينة اقدر اثبتها عليها ..
دايرك تتصرف بي طريقتك .. عن طريق واحدة من صاحباتها .. تعرف لي البت دي ..وسلوكياتها وداسة علينا شنو؟
لاني انا مابقدر اعمل علاقة مع واحدة من صاحباتها .. صعبة شديد .. بس انت مابتعرفك .. وما ح تعرف انك بتعرفني ..
صلاح قال ليهو هي بتقرا في ياتو مدرسة ؟
قال ليهو بتقرا في المدرسة الفلانية ..
قال ليهو اقول ليك قولة ؟؟ والله انت محظوظ حظ عجيب ياعوض وعلى حسب نية خالك .. انا عندي اخت صاحبي.. بتقرا في نفس المدرسة دي .. وكمان خاتة عينها علي .. انا اصلا" ماعندي ليها حاجة ..لكن حاظبط معاها العلاقة ..بس عشان الموضوع ده ..
عوض قال ليهو حلو شديد.. بس اهم حاجة تجيب اخبار سهام بالتفصيل .. وبتطلع ولا مابتطلع؟ ولوبتطلع بتطلع منو؟ .. لو في اي زول مثبتها تجيب لي عنوانو بالكامل .. واسمو وانت طبعا" ح تكون بره الصورة ..
والله يا صلاح انا شدة الموضوع ماشاغلني.. ماقادر انوم بالليل كويس .. انت عارف الاعراض نحن بتعمل لينا قلقل كيف ..
صلاح قال ليهو من هسي اطمن ..وخت في بطن بطيخة صيفية .. والله انا اصعب من ناس المباحث المركزية ..وكمان موضوع بهمك انت .. انا من باكر بتفرغ للموضوع ده ..
قال ليهو يازول على بركة الله وربنا يوفقك .. اول ما تجمع المعلومات المؤكدة .. تديني (الو) ونتلاقا .. قال ليهو يازول اتفقنا ..
وكملو كلامهم غايتو .. وعوض اتحرك مشى منو طوالي على البيت ..
في البيت هناك كان في تحركات غريبة وعجيبة .. قبل عوض مايجي ..
فهيمة قالت للسر .. انت عارف يا السر .. انا يتخيلي عوض ده داير بتك سهام ..
قال ليها عرفتي كيف يافهيمة الفهيمة ؟؟
قالت ليهو امبارح كان بعاين ليها معاينة غريبة خلاص .. وهي وكت تتلفت عليهو يقبل منها غادي .. وهي ترتعش وتبلع في ريقها ..
وكت جيت سألتها .. قعدت تتكلم عنو كلام الحبايب والقرايب .. ده زول ممتاز .. وده زول حنين .. وجا يساعدنا .. وشنو وشنو..
انا في راي يا السر تتكلم معاهو طوالي ..عشان تكون على بينة .. قول ليهو رايك في سهام بتي دي شنو؟
السر قال ليها انتي يافهيمة ما نصيحة ؟؟ كيف يعني اعرض عليهو بتي لي مجرد اوهامك؟؟ ..
هسي كان احرجني وقال لي ماعايزها.. انا اودي وشي وين تاني ؟؟
قالت ليهو ولاشي يعني شنو؟.. على الاقل نكون اتاكدنا من الشكوك ..
قال ليها اذا ما مشكلة اسأليهو انتي .. واتاكدي من شكوكك انا ماعندي شكوك ..
قالت ليهو والله الليلة .. أكان اتكلم معاهو واليحصل يحصل ..
والليلة ياعوض هههه
الى اللقاء ...
 
 
 
 
 
 
    رد مع اقتباس
قديم 07-11-2015, 11:51 PM   #4

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل .
الحلقة 4
طارق اللبيب .
اول عوض وصل البيت .. ما وصل وقعد استرخى كدا .. لقى سهام قاعدة .. والليلة ما مشت تذاكر مع صاحباتها ..
والغريبة انو امها ما شاورتها في العايزة تعملو .. اها في برندة غربية كدا .. بقعدو فيها الاولاد بالنهار .. قريبة من الغرفة بتاعتهم .. مشت قعدت فيها وقالت لي الولد الكبير اسمو الامين . امشي عليك الله يا الامين نادي عوض الامين جرى ناداهو وجا ..
عوض لقاها قاعدة براها في البرندة .. في سرير مجلد بي بلاستيك عالي كدا .
مملصة سفنجاتها وبتلولح في كرعيها .. زي الزول المتوتر وماعايز التوتر يظهر عليهو .. اول من جا عوض قعدت تتبسم بالغصب . كدا البسمة ذاته معروفة بسمة زي بسمة الشافع وكت يناديهو الاستاذ . لي عقاب ..
وفي سرير تاني قعد فيهو عوض .. قال ليها ان شاء الله خير يا فهيمة .. القعدة دي الليلة بس ان شاء الله يكون فيها كلام ليهو ثمرة ..
قالت ليهو غايتو انت وخالك حاقرين بي.. وشايفيني ماعندي اي موضوع .. المهم ياعوض . طبعا" انت شايف سهام دي بعد ده بقت للعرس تب .. وفي القراية ذاتها مي ماشة لي قدام .. وما في اقرب ليها منك .. نحن قلنا كان انت عندك الرغبة .. نشاورك انت اول قبال مانديها لزول غريب ..
يازوووول عوض زي الفي زول الكبا فوقو موية صااااقطة في البرد الساعة 5 صباحا" ... هههه . لامن شهق ..
قال ليها انا؟؟؟ سهام؟؟.. بي استغراب .. بدون مايحس بس ديل الكلمتين القالن ..
قالت ليهو ايوة.. انت وسهام .. الغريب شنو يعني انت ماعايزها ؟
قال ليها انتي سألتيها؟.. قالت ليهو شن دايرة تقول؟؟ هي لاقياك وين؟
قال ليها بس انتي اسأليها من رايها وتعالي لي ..
قالت ليهو طيب انت وريني .. انا بسألها .. قال ليهاانا قاعد بس بعد تجاوب ليك هي .. انا بوريك راي ..
قالت ليهو كويس .. وقام مشى فات.. وقلبو مقطوع من الخوف .
مشت الام الغبيانة طوالي نادت بتها .. وارتكبت اكبر غلطة في حياتها .. قالت ليها يا سهام .. ودعمتك ده قال عايزك .. انتي رايك شنو ؟؟.. قالت ليها منو؟.. عوض؟ قالت ليها ايوة .. عوض نان منو؟
سهام ردت قالت ليها .. عوض؟؟؟ انا؟؟
هو قال ليك كدا؟.. قالت ليها ايوة قال .. انتي رايك شنو وريني بسرعة .. عشان هو منتظر ردك ..
سهام عاينت بعيد .. وسرحت واتبسمت .. وفي سرحتها قالت لامها براحة كدا.. انا ماعندي مانع .. (انا شخصيا ماعارف الابتسامة دي معناها شنو. هل هي ابتسامة فرحة ولا ابتسامة خباثة).. امها طوالي قامت من جمبها .. ومشت رسلت نادت عوض تاني .. والموضوع ده كلو .. والجرجرة دي عمك السر ماجايب ليهو خبر .. وكت شاف المناداة بتاعة عوض كترت ؟؟ قال ليهو في شنو ياعوض؟؟ انت كل مرة بنادوك؟؟ .. مالا فهيمة؟ ان شاء الله مافي مشكلة؟ .. معقول يكون السر نسى الموضوع.. ولا بتستهبل ساي عامل رايح؟
عوض قال ليهو موضوع عادي.. انت ماعارف مواضيع فهيمة ؟
اها عوض وكت جا المرة دي .. لقى فهيمة فرحانةعديل .. احتار في الاجابة المتوقعة ..
قالت ليهو اها يا عوض.. انا سألت سهام .. وسهام قالت قبلانة ماعندها اي مانع ..
قال ليها معقولة؟؟ والله انا مستغرب .. لاني بشوفها بالضبط زي اختي الصغيرة .. دي ما مشكلة المشكلة دراستها .. وانا شايفها لسه صغيرة في السن .. وبعدين فارق العمر بيني وبينها كبير ..
قالت ليهو لالا.. ده ما عذر .. السر خالك اكبر مني ب 15 سنة .. بس هسي اديني . الراي الاخير .. قال ليها والله انا هسي ما مفكر في زواج.. وده اخر كلام عندي .. انا ماشي يافهيمة ..
وقام طوالي فات ..
فهيمة ماقدرت تعرف.. ده كلام حقيقي ولا كلام خجلة ساي ..
لانه سهام مافي زول ممكن يرفضها من جمالها .. وطعم كلامها ..
بس لانهم ماعارفين المانع عوض شنو..
طبعا" عوض لو ما شك فيها وشافا بي عينو .. ماكان برفضها ولا كان بيحلم بي عرض زي ده ..
على كل حال طلعت المعاينة الشافتها فهيمة .. من عوض لي سهام ما معاينة اعجاب وحب .. زي ماهي افتكرت .. وفهيمة اتاكدت من كدا ..
اها بعد عوض المساء طلع على السوق .. عشان يشد القدرة بتاعة بكرة .. فهيمة مشت قالت لي السر .. الزول ده ماداير بتك لي زواج .. لكن بعاين ليها ليه؟؟ الله اعلم ربنا يجيب العواقب سليمة ..
قال ليها انتي قاصدة شنو انتي يافهيمة ..؟؟ قالت ليهو يعني واحد بعاين ليهو لي بت سمحة زي سهام.. ومقهي فيها .. لامن فاتح خشمو .. والبت ذاتها ملاحظة للمعاينة وتتخجل .. ولامن يسألوه يقول ماداير عرس .. معناها الزول ده نيتو شنو؟؟ براك افهم يا مخلوق ..
المشكلة انو فهيمة بتقول في الكلام ده لي السر .. وسهام واقفة بي ورا الشباك بتسمع .. واستغربت جدا في كضب امها القالت ليها قال عايزك ..
على كل حال فهيمة فهمت السر انو عوض رغبتو في سهام مارغبة شريفة .. والكلام ده اثر في السر اثر شديد ..
وقال لي فهيمة اهو ده الكلام الكنت خايف منو.. انتي ذاتك غلطانة تمشي تسأليهو ليه؟
اما مسألة قصدو وماقصدو .. بتي براها زولة واعية.. وانا واثق فيها . لو شافت منو اي حركة.. بتجي تكلمنا انا متأكد..
هنا سهام قعدت تتبسم .. وقالت في سرها .. وقعت معاي ياعوض الاهبل ..
والله عوض يفتح خشمو يقول عني حاجة لابوي .. الا انا انسج فوقو من الخيال السينمائي .. واضيعو ليك بي شربة موية ..
مرت الايام .. ومافي جديد في موضوع صلاح الرسلوهو .. قام عوض ضرب ليهو.. قال ليهو ياخي انا منتظرك فوق جمرا" تهبو الريح الحصل شنو؟
قال ليهو انت وين ياعوض ؟
قال ليهو انا في السوق . يادوب خلصت ..
صلاح قال ليهو خلاص انا قريب منك .. جاييك هسي ..
صلاح وصل لي عوض في غضون ربع ساعة.. وسلم عليهو .. وعوض قال ليهو انت اتأخرت علي .. وانا احتمال الاسبوع الجاي اقوم الخرطوم .. لانو خالي السر ده متغير مني بلاسبب ..
وهو اصلا بقى كويس .. وباكر احتمال ينزل شغلو عادي .. الحصل شنوفي الموضوع الوصيتك عليهو ياصلاح ؟؟..
صلاح قال ليهو والله حصل شي فوق الحسبان .. اولا مشيت المدرسة تاني يوم طوالي .. وسألت من ميادة .. ميادة لقيتها مافي . قالو ليها اسبوعين ماجات .عيانة في البيت .. رجعت وتاني يوم اتصلت على مصعب اخوها .. زول صاحبي شديد .. وقلت ليهو انا جاييك في البيت .. وفعلا مشيت ليهو .. وما وضحت ليهو اني عارفها عيانة .. قام هو بعد دخل وجاب لي واجب الاكرام .
حكى لي .. قال لي ميادة اختي عيانة شديد .. عندها تكسير في كرويات الدم .. وتعبانة جدا وغالبها الكلام .. ومرات تجيها غيبوبة .. رقدنا بيها في المستشفى .. ونقلو ليها دم كمية .. انت ده كلو ماسمعت بيهو؟ . وهسي كانت تعبانة جدا ومحمومة ..وكت سمعت انك انت هنا .. فتحت عيونا .. وقالت مالو الزول ده طول مننا كدي؟ ..
عليك الله يا صلاح ادخل سلم عليها .. الزولة بتعزك معزة شديدة ..
والله ياعوض وكت دخلت اسلم عليها.. لقيت ميادة البتشبه التفاحة ديك . بقت ضعيفة وسودا.. وعيونا ديل مغورقات .. والله حنيت عليها لامن بكيت .. وكت شافتني .. دايرة تقوم على حيلا .. وفرحت فرح .. لامن الفرح ظهر فوق وشيها .. وناس البيت ذاتهم فرحو معاها .. اصلا هي متعلقة بي من زمان .. واظن ناس البيت كاشفين الحكاية دي ..
وانا جريت الكرسي وقعدت جمبها .. وبدون ما أحس قلت ليها والله العظيم ياميادة انا جيت مخصوص عشانك.. ماعشان مصعب .. والله ماكنت عارفك عيانة .. ان شاء الله تقومي بالسلامة.. وانا في انتظارك . عارف ناس البيت كلهم بسمعو في كلامي .. وقلت الكلام بدون ما احس ..
اها تاني مالقيت طريقة أسال من موضوعك.. والظروف ذاتها ماكانت مساعدة .. وهسع انا جاي منهم ..
انت الحصل في موضوعك شنو ؟
قال ليهو والله موضوعي هسي كلو طار من راسي بي موضوع البت الحكيت لي بيها دي ..
لكن بالجد انا في ورطة كبيرة .. عارف حصل حصل .. حكا ليهو موضوع فهيمة القالتو ليهو .. وقال ليهو والله انا بقيت في وضع لا أحسد عليه .. وهسي خلاص غيرت راي داير اسافر ..
لكن داير اعمل عملية اخيرة ابرء بيها ذمتي .. وماعارف تنجح او ما تنجح .. قال ليهو قول .. النشوف فكرتك ..
قال ليهو نمشي المدرسة عديل.. ونلاقي اي بت من بنات الدفعة بتاعة سهام .. ونحاول نفهم منها الحاصل ..
انا البت دي لو بقت بريئة من شكوكي دي .. والله اجدع فوقها الحبل تب واعرسها .. ما نداير اخير منها ..
ولو بقت زيها وزي باقي البنات الفي الزمن ده .. بكلم خالي بالحقيقة وبسافر ..
صلاح قال ليهو خلي الموضوع ده علي انا .. انت ممكن سهام تشوفك في المدرسة ..
انا باكر بجيك هنا .. ومشى منو ..
اها صلاح باكر مشى المدرسة .. صلاح زول وجيه ولبيس .. البنات لمن شافنو اليوم الاول الجا يسأل من ميادة .. كلهن جنن فيهو.. قعدن يعلقن طبعا .. بنات الثانوي .. عندهن هوس غريب ..
اها وكت جا تاني يوم .. عرفن انو الزول ده ماجاي لي ميادة .. عندو هدف .. مشى طوالي على المديره .. وسأل من حاجات كدا .. عشان يبرر دخولو المدرسة .قال ليها عندو بت اخوه داير يجيبها يسجلا وشنو وشنو .. كلام فاضي ..
ولاحظ انو البنات بعاينن ومقهيات فيهو ..
مشى طلع الشارع وقف جم دكان . جن اتنين من البنات عاملات دايرات يشترن حاجة ..
سلم عليهن وطوالي وقال لي بتاع الدكان .. اتنين بارد لو سمحته..
وهن طبعا" يعجبنك .. لالا ماممكن مشكور .. وبتاع ..
قال ليها شيلي يابت بلا كلام فاضي .. اشربي وتعالي وراي .. مشى وقف هناك كدا .. واحدة فيهن جاتو والتانية ابت ..
اول من جات وقفت تتخجل وتتعاور .. قال ليها ياخي اسمعي باختصار .. انا داير اسألك من زولة بتقرا معاكم .. قالت ليهو اسمها منو؟
قال ليها اسمها سهام السر .. قالت ليهو بتسأل عن شنو ؟ قال ليها بسأل عن اخلاقها وسلوكها وسيرتها في المدرسة ومستواها الدراسي ..
قالت ليهو سهام تافهه وبتاعة اولاد وحقيرة وبليدة .. وقالت ليهو جنس كلام ولا بتقال فوق الخشم .. بدون اي حياء ..
قال ليها خلاص خلاص .. فهمت .. طيب ومياده ؟؟
قالت ليهو ميادة كويسة لكن قوالة .. اي كلام تشوفو تتلفزه وتنقلو بي ضبانتو ..
قال ليها على الاقل ما بتزيد عليهو كلام فاضي ..
قالت ليهو هسي انت ولاعرفتني بي نفسك .. قال ليها .. انا اسمي ابويزيد البسطامي .. حلي عن افكاري يلا ..
وفات طوالي ..
الى اللقاء ..
 
 
 
 
 
 
    رد مع اقتباس
قديم 07-11-2015, 11:52 PM   #5

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل .
الحلقة 5
بقلم طارق اللبيب .
صلاح من المدرسة .. طوالي مشى على عوض في السوق .. ولقاهو منتظره قاعد .. ومشو قعدو الاتنين جم عشة ست الشاي .. صلاح قال ليهو والله ماعارف احكي ليك اقول ليك شنو؟
حصل كيت كيت .. تلفز ليهو الفيلم الحصل من اولو لي اخرو ..
عوض قال ليهو والله اقول ليك حاجة .. اولا" البت الجات بارياك دي.. بتكون ختت بالها عليك .. وده واضح من تصرفها ..بعد كدا اي بت تذكرها قدامها .. بتمسح ليك بيها الواطة .. كان سمحة كان كعبة .. يعني الكلام ده ما مؤكد ياصلاح .. والبت دي شهادتها عندي مجروحة .. بس كونها قالت بليدة ده كلام صاح ..
لكن الكلام الباقي ده ماعارف .. ماعارف والله ياصلاح .. وده كلام ما المفروض يتقال بدون تأكيد ..
لانو البت بكون موقفها مع ابوها حساس .. واخاف أكون ظالمها بي كلام ماحقيقي .. وانا لايمكن احكي لي خالي كلام مامؤكد ..
خلاص انسى الموضوع .. عاد نسوي شنو؟.. كل البنقدر عليهو عملناهو .. وما اتوصلنا لي نتيجة .. انا والله كل هدفي كان احمي عرض خالي .
المهم اخدو قعدتهم ديك.. ويحكو في امور البنات وحركاتن .. وكل واحد فات على جيهة .. المهم في الموضوع عوض ماصدق كلام البت بتاعة المدرسة .. لكن زاد شكوكو ..
اها باكر حصلت حاجة .. البت الاتكلم معاها صلاح البارح في المدرسة . لاقت سهام في المدرسة .. وقالت ليها ياسهام انتي عارفة؟؟ . في زول بتجسس عليك .. ماعارفة الزول ده عايزك .. ولا عايز يرميك في مشكلة ..
ولو كان عايزك معناها زول شكاك .. المفروض تعملي حسابك على تحركاتك .. لانك مراقبة ..
في ولد زي 27 سنة كدا .. جا امبارح هنا.. ولاقانا انا ورفيدة ..وعزمنا حاجة باردة من الدكان ده .. وجاء مخصوص عشان يسأل منك ..وسألني من اخلاقك وسلوكياتك .. وانا قلت ليهو مابعرف عنها اي شي ..
هنا طوالي سهام عرفت انو ده عوض.. جا لاحقا في المدرسة.. بتجسس عليها وبسأل منها .. وداير يثبت عليها حاجة ويرميها في مشكلة مع ابوها ..
وزعلت زعل شديد خلاص .. واصرت تنتقم منو ..
والبت وكت شافت سهام اتضايقت .. قالت ليها انتي يا سهام عرفتيهو الزول ده ..؟
قالت ليها كيف مابعرفو.. ده ودعمتي.. وقاعد معانا في البيت .. واليومين ديل مسبب لي ضيق .. وشكلو داير يعمل فتنة بيني وبين ابوي ..
لكن انا بطيرو ليك اصبري لي ..
اها في نهاية اليوم .. مشت البيت طبعا والليلة بالذات ابوها مافي .. في السوق.. كان المفروض يكون قاعد وكت هي تجي من المدرسة.. لكن مشى يرتاح في بيت واحد صاحبو قريب من المحل في السوق .. طلب منو يقيل معاهو لغاية المساء .. عشان مايمشي الحلة ويجي مرتين ..
المهم انتظرت ابوها لغاية المساء جا ..
جات قعدت جمب ابوها.. وتدعك في ايديها .. وابوها حس انو البت دي دايرة تقول كلام .. وخايفة منو..
قال ليها سهام؟؟ مالك في شنو؟
قولي اي حاجة.. انا ابوك .. وبيني وبينك مافي خوف.. نحن موش قلنا اصحاب ؟؟ احكي لي مالك..
قالت ليهو والله يا ابوي .. ماعارفة اقول ليك الكلام كيف .. قال ليها انتي وريني الكلام بتعلق بشنو؟ وانا براي بفهم ..
قالت ليهو عوض يا ابوي .. قال ليها خلاص فهمت .. اتضايقتي منو صح؟.. قالت ليهو للاسف.. والله يا ابوي انا اسفه اقول ليك الكلام ده ..
قال ليها خلاص خلاص.. الموضوع ده تاني ما تفتحيهو .. عشان امك ماتسمع.. تقوم تعيرني بيهو .. خليني انا بتصرف براي ..
قامت دايرة تمشي قال ليها .. الله يحفظك يابتي.. ابدا" ما خيبتي ظني .. انا عارف لو حصلت ليك اي حاجة ماياها .. بتجي تقولي لي طوالي .. كدا والله زادت ثقتي فيك وريدتي ليك ..
خلاص امشي على قرايتك ربنا يوفقك ..
البت مشت فرحانة فرحة.. لمن حست روحها دايرة تنطط وتكورك .. تقول للناس انا سعيدة انا انتصرت ..
دخلت غرفتها .. وعاينت في المراة وقالت (عوض يا مغفل لو داير تتعشى بي انا اتغديت بيك) انا بتك يا السر .
وعمك السر بقى متوتر وحالتو صعبة .. ومنتظر ليمتين يجي عوض.. عشان يوريهو الكلام المابعرفو .. عوض يازول طبعا" جاي مطمئن.. ومقرر جواهو يسيب الموضوع بتاع التحقق من البت ....
اها اول من جاء السر قال ليهو دقيقة انا دايرك.. اقعد هسي بجيك.. ودخل جوة قال لي فهيمة وسهام مافيكن واحدة تجي بيغادي.. انا عندي كلام مع عوض ..
وجا قعد .. قال ليهو والله ياعوض خيبت ظني الله يخيبك .. طلعت زول وسخان الله يخيبك .. ياخي انا ارسل ليك انت من دون اي زول.. عشان تجي تساعدني وترعى لي اولادي .. تجي تكون انت السفيه؟؟ ..تكون انت المرفعين البحرسوه الغنم؟؟ .. يخسي عليك وعلى تربيتك ..
طبعا" عوض اتفاجأ بالكلام ده .. أول مرة خالو الحبيب يقول ليهو كلام زي ده .. قال ليهو في شنو ياخالي ؟.. قال ليهو الخلا اليبلعك.. كمان بتقول لي ياخالي؟؟ .. انت متذكر انو انا خالك عليك الله؟؟ يخسي عليك ..
قال ليهو على الاقل فهمني في شنو؟
قال ليهو يعني عامل فيها ماعارف؟.. عامل فيها ماحاصل حاجة ؟؟ اساسا عارفك ح تنكر .. الشينة منكورة ..
قال ليهو ياخالي اديني فرصة ادافع عن نفسي .. اي زول في دي الدنيا غلطان . بوروهو غلطو .. وبدوهو فرصة يدافع عن نفسه.. ماتظلمني .. وريني مالي؟ .. واديني فرصة ادافع عن نفسي .
قال ليهو تدافع عن نفسك لو كان انا داير اعاقبك .. انا ماعايز اعاقبك .. ولا بتكلم معاك اي كلام .. ولا يمكن اقول لزول عن خيابتك.. لانو دي سمعة سيئة لي انا.. للاسف .. بس ح أسيبك كدا .. وده عقابي ليك .. وتاني ماعندك خال اسمو السر ..
عوض قال ليهو يعني ما ح تقول لي انا مالي؟ .. خير ياخال التقول عليهو يمشي .. بس انت هدي نفسك شوية.. انا باكر مسافر .. ماتزعل روحك انت عيان .. السر طبعا يرجف من الزعل زي القصبة ..وبتكلم بي انفعالية لامن مطلع زبد بي اطراف شفايفو .. وطلع من الغرفة طوالي مشى بيغادي ..
وعوض بدا يلملم في هدومو .. نزل البنطلون داك المعلق والقميص المطبق تحت اللحاف .. وكورك لي فهيمة تجيب ليهو باقي الهدوم .. ودفس النضيف على الوسخان .. وشال شنطتو في الليل داك ومرق طوالي .. كورك لي خالو ودعتك الله ياخال انا ماشي .. مع السلامة يافهيمة .. ولافي زول رد عليهو كلهم قاعدين بهناك ..
طلع طوالي .. في الشارع اتصل على صلاح .. قال ليهو انا جاي بايت معاك ياصلاح ..
قال ليهو انا مع ناس مصعب .. انتظرني في الحتة الفلانية .. اخلص واجيك .. ميادة دي تعبانة .. ومعانا زول بقرا ليها في قرآن .. بس نخلص واجيك ..
قال ليهو سريع ياصلاح .. انا ذاتي داير لي زول يقرا لي قرآن .. انا تعبان نفسيا .. وفعلا ياجماعة عوض ده مضايق ضيق لامن بكى .
وهو ماعارف الحاصل شنو.. ايوة شاكي انو سهام او امها يكونو قالو عنو كلام ماياهو .. واتهموهو بي حاجة.. بس ماعرف التفاصيل وخالو ابا يحكي ليهو .. والحكاية تاعباهو تعب شديد .. وراسو داير يطرشق من التفكير ..
بعد نص ساعة بالضبط .. اتلاقو هو وصلاح .. ومشو البيت وبقى يحكي ليهو في الحصل ..
صلاح قال ليهو والله حاشاك يا ابو الرجال .. والله خالك مافاهمك بس .. انت ساعي عشان تصون عرضو .. يتهمك بي الخيانة؟؟ .. والله ده كلام صعب خلاص ..
قال ليهو خالي مسكين ياصلاح.. ديل الحريم بكونن غسلن ليهو دماغو بالكذب .. غايتو قالو ليهو شنو انا ماعارف .. لكن انا متأكد انو سهام خايفة مني.. اقول لي ابوها حاجة .. قامت لفقت فيني كلام .. لكن امري لله .. مافي مشكلة ربنا موجود يا صلاح ..
لكن انا خايف انو البت دي.. تجيب ليهو كفوة .. وبعدين يتفاجأ انو ظلمني .. ويندم وكت الندم مابفيد .. قال ليهو رايك شنو انا اتكلم مع خالك ده .. واوريهو انت شنو بالضبط .. والبت قالت فيك كدا ليه ..
قال ليهو لالا ماتقول ليهو .. نحن اساسا" ماعارفين الحاصل شنو.. ومين الاتكلم فيني .. البت ولا امها.. اوزول تاني .. وقالو شنو.. يعني نحن هسي بنخمن .. لانو هو ماصرح لي باي كلام.. وده الشي المتعبني .. لالا ياصلاح .. انت ماتقول اي كلام.. لو مشيت اتكلمت معاهو.. بتزيد الطين بله .. والمشكلة بتتفاقم ..
صلاح قال ليهو والله انت زول راجل يا عوض .. والله انت مكسب .. والله خالك هو الخسران.. ياسلام ياخ .. بالله الزمن ده فضل ناس زيك كدي ..
عوض قال ليهو ياخي ماتبالغ انت كمان.. انا شنو كمان؟ غير اني عوير ومغفل ساي .. والله كان شفتني قبيل ابكي زي الاهبل ههه ..
كدي خلينا من الموضوع ده.. البت العيانة بقت كيف ..
قال ليهو والله حكاية عجيبة خلاص .. ياخي الزولة دي طبعا انا ومصعب جبنا ليها واحد صاحبنا شيخ من اهل القران.. وقعد يقرا ليها .. بس قعدت تصرخ واتضايقت ضيق شديد .. وبقت تفرفر وتصارع .. والله جاتها قوة .. تقول اندرتيكر المصارع .. ولا نحن ولا الشيخ ماعرفنا الحاصل شنو .. عوض قال ليهو بكون يا عندها جن او مضروبة عين .. ولا عاملين ليها سحر .. جماعتكم الهنا ديل خطرين شديد .. لكن القران شفا يازول ان شاء الله تبقى كويسة .. ٌقال ليهو انشاء الله .. والله تصدق يا عوض سبحان الله البت دي انا من شفتها عيانة.. ومقابلتها لي اول يوم .. كانو اتزرع جواي حبها بدون مقدمات .. شوف مع انو وقتها الكانت كويسة وجميلة ما حبيتها .. حبيتها بعد لقيتها عيانة وشكلها متغير .. ده يكون شنو؟؟
عوض قال ليهو ده الحب الروحي يامعلم .. ده هو الاصل البكون مستمر مدى الحياة.. ان شاء الله تبقى كويسة يا صلاح.. قلبي معاك ومعاها ..
وبعد العشاء الونسة جرت.. واتكلمو في شتى المواضيع .. وصلاح نعس.. وبدا يتكلم بلسان تقيل .. عوض قال ليهو والله ياصلاح.. انت المكسب الوحيد في سفرتي لي مدني دي كلها .. ولو خسرت اي حاجة .. ما دام ربحتك انت انا ماخسران .. والله جد..
صلاح؟ هالو ؟؟ يازول ؟؟ ههه نام والله بالو فاضي فضيه ..
الى اللقاء ..
 
 
 
 
 
 
    رد مع اقتباس
قديم 07-11-2015, 11:53 PM   #6

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل .
الحلقة 6
بقلم طارق اللبيب ..
عوض يازول النوم ماجاهو كلو كلو .. زعلان وحزين وخايف .. زعلان انو ماعارف الحاصل .. وحزين انو فقد خالو البحبو .. وخايف ان تكون البت لفقت فيهو تهمة .. وبرضو خايف عليها من الضياع .. لغاية قريب الساعة 2 صباح حتى شوية كدا عيونو شربكن ..
قام الصباح بدري اتوضا وصحى صلاح .. قال ليهو قوم صلي .. عشان انا طالع طوالي ..
صلاح قام مخلوع.. قال ليهو انت بي صحك يعني؟؟ مسافر الليلة ؟ قال ليهو اول انت قايلني بهظر؟
يلا يلا قوم اتوضا انا مارق ..
قال ليهو على الاقل اصبر اشرب الشاي .. واستحمى وخلي الواطة توضح شوية ..
عوض ولاشغال بالكلام .. قال ليهو عليك الله ياصلاح خارجني انا متضايق والله .. والله خلاص نفسياتي وروحي دارت القومة.. تاني مابقدر استقر .. خلاص قلقت .. انت اظنك ما حاسي بي..
قال لهو والله ياعوض حاسي بيك .. خلاص بس دقايق .. النتوضا نصلي ونطلع ..
المهم يازول بعد الصلاة .. وطلعو طوالي ركبو مشو البصات .. وشربو الشاي هناك في الموقف .. وعوض ركب وفي جيبو مافي غير عشرة جنيه ..
..بس ربك رب الخير .. صلاح بدون مايشاورو قطع ليهو التذكرة .. والا كان مامعروف يعمل شنو ..
اخر حاجة اتوادعو .. وقال ليهو عليك الله ياصلاح ماتقطع خبرك مننا .. انا اول من اصل بديك تلفون .. في امان الله في الله والبص دور وقام الى عاصمة البلد ..
عوض في الطريق بي نفس الهم والغم لكن برضو بحاول يصبر في نفسو .. يازول انا مادام ماعامل حاجة غلط المضايقني شنو؟ خلي السر يفتكر العايز يفتكرو اهم حاجة ثقتي في نفسي واحترامي ليها .. كتير من الناس بتظلم الناس .. بي كلام مالو اساس من الصحة بس الله في ..
عوض وصل البيت .. ووشو يلعن قفاهو وصل تقريبا زي الساعة 11 كدا ناس عوض ساكنين في الثورة الحارة 14 .. قريب مجطة حميدان ..
عندو اخويين اتنين وماعندو اخت .. اخوهو الكبير اكبر منو اسمو محمد مهندس بترول شغال في هجليج ..
واخوهو الاصغر منو اسمو حافظ طالب بقرا هندسة مكانيكا في جامعة السودان .. ابوهو الحاج ود الضريس عندو دكان بتاع توابل في سوق الطشاتة .. في سوق امدرمان ..
وامهم اسمها مهدية من المحس السكنو في توتي من بدري واستوطنو وهم تقريبا اهل توتي الاصليين .. زي ناس شمبات والحلفايا والصبابي وديل ناس الشيخ ادريس ود الارباب راجل العيلفون .. المراة مراة صالحة وبت صالحين بكل المقاييس .. والسر اخوها ود امها وابوها وبتريدو ريدة غريبة ..
اول عوض من جا طبعا عدى في مدني 18 يوم بالتمام والكمال ..
ومهدية بتسأل فيهو من اخوها واولادو .. عوض قال ليها ياسلاااام .. والله ناس ماشاء الله .. بعد سلم علي امو قال ليها دقيقة عندي اتصال وبجيك .. اتصل على صلاح وطنو قال ليهو انا وصلت تب ياعشا البايتات ..
وجاء راجع لي امو بحكي ليها قال ليها ..
اول حاجة يا امي طبعا لقيت السر خالي تعبان .. لكن الحمد لله كل يوم كان بيمشي احسن من اليوم القبلو .. وهسي تمام التمام ..وانا قلت لو ما بقى زي البمب ومسك شغلو براهو مابجي .. هسي الحمد لله ليهو يومين .. شغال في قدرتو زي الماحصل شي .. شكلو بقى احسن من زمان.. مايقوم يعمل ليهو عرسه فوق فهيمة .. وامو دي تسمع وتضحك.. سعيدة ومبسوطة ..قالت ليهو غايتو انت ياعوض طمستك دي اصلك مابتخليها .. اوعه يكون عوارتك دي قاعد تقولا قدام فهيمه .. قال ليها لالا يا امي ..ده هظار بقولو ليك انتي ساي ..انا عارف الحريم مابرضنو .. بعدين فهيمة زولة محترماني ومقدراني.. كيف اجرح مشاعرها ..
قالت ليهو اها عليك الله كيف سهام المسلطة ..والله مشتاقالا شوق .. قال ليها تمام التمام اليومين ديل مسكينة مدروشة شديد مع الدراسة لانها ممتحنة .. انا ذاتي ما لاقيتها كتير.. بس تسأل منك حد ..وتسلم عليك .. لالا كلهم تمام ..الحمد لله انتي كيف وابوي كيف؟ .. قالت ليهو نحن الحمد لله في امن وامان ..
تتذكر يا عوض الجماعة بتاعين الورشة الزمان اشتغلت معاهم ديك؟؟ جوك هنا يومين كدا بسألو منك..
قلت ليهم عندك مأمورية لي مدني .. وختو تلفونهم . قالو اول ماتجي تتصل عليهم ..
قال ليها ديل كمان الذكرهم لي شنو .. ديل انا فارقتهم وتلفوني مون عارفنو .. يا امي الناس ديل مانافعين معاي .. ولابشتغل معاهم تاني ياخي ديل كلهم حرامية .. انتي ماعارفة الحاصل ساي ..
قالت ليهو مالهم كدي وريني ماتتهرب ساي .. ديل ناس الظاهر عليهم ناس طيبين .. قال ليها طيبة انتي بابت العوض .
عارفة ديل بجيهم الزول بي عربيتو ..يقولو ليهو محتاجة للاسبير الفلاني ..والاسبير الفلاني .. ويجيبو ليهو فاتورة عديل من محل الاسبيرات .. ويدفع القروش ..وهم ولا يكونو ركبو ليهو اي اسبير .. ولا اشتروه من اساسو ..
ومرات لو العطل بسيط ..يقولو لي سيد العربية حاجة تشيب الراس .. والعربية ولا تكون فيها مشكلة كبيرة ..بس عشان يدفع .. وماهم كدا براهم ..غالبية ناس المنطقة شغالين بالطريقة دي ..
قالت ليهو طيب ياولدي ..هسي انت ح تعمل شنو يعني؟؟ ده الشغل الرابع انت تمرق منو ..
قال ليها والله يا امي انا في البص فكرت لي في فكرة غايتو .. عارفة انا بي شغلي الاسبوعين ديل مع خالي اكتسبت خبرة كبيرة في القدرة والفول .. والله انا القى لي محل بتاع فول . والله ابوي ده تاني سوق امدرمان ده مايقيل فيهو ..
والله يا امي القروش والربح الفي القدرة دي.. لاحكت ولابقت وانا عرفت ليك سر الموضوع ..وبقت واقعة لي تب..
قالت ليهو اها تلقى المحل وين؟ .. قال ليها كدي يجي ابوي وانا بتفاهم معاهو ..
...
طبعا فعلا ياجماعة .. بدل الزول مايبقى عاطل وعالة على ناس البيت .. يشوف ليهو اي صنعة يشتغل فيها.. حتى لو عامل بسيط .. والاجرة مابتغطي معاهو .. ليكسب الخبرة ..ويتعلم الصنعة ..
والظروف مامعروفه.. يعني الزول احتمال تتاح ليهو فرصة في عمل كبير ..يكون جاهز وعارف الرصة ..
احكي ليكم القصة العجيبة دي ..في نفس الموضوع ..ونجي نواصل مع عوض ..
كان في راجل متزوج وعندو ولد وبت اطفال يعني البت 9 سنة والولد تقريبا خمسة سنة .. البت اسمها سارة ..
المهم الراجل حالتو المادية بسيطة ..ورزق اليوم باليوم .. الراجل ده حصل ليهو حادث واتوفى في الحال .. ومراتو انسانة جميلة وصغيرة في السن ..بقت تمشي تشتغل في البيوت ..وتغسل هدوم الناس .. وتعيش في اطفالها بالشرف والعفة .. وطبعا ما مغطي معاها على حسب البلد البقت قاتلة .. نسأل الله السلامة ..
يوم كانت بتفتش لي شغل في واحد ناداها يشغلها في بيتو .. وكان البيت فاضي ..عشان كدا ساقت معاها بتها ..والراجل طلع حقير ادا البت عقار منوم ..وحاول يستغل الام استغلال قذر .. والمراة بت رجال ضربتو وشالت بتها نايمة .. وطلعت . ومن الزعل جاتها جلطة وقعت في الشارع .. ورقدت مستشفى ..وانشلت شلل نصفي ..
عندها جارتها مراة صالحة شغالة حنانة.. مسكت الاولاد عندها .. وبقت مراعية الام في المستشفى .. والبت بقت تراقب في الحنانة .. وتلقط في الصنعة .. وحبت العملية شديد .. وبقت تحنن صاحباتها الصغار ..
وكانت البت فنانة لدرجة ملفتة .. لدرجة انو الناس لاحظو ليها والحنانة بقت مراعياها .. شوية بقت الحنانة وكت تمشي المستشفى بتخلي البت تحنن ليها النسوان الكبار .. طيلة فترة الاربع شهور الراقداهن المراة في المستشفى ..البت سارة بقت حنانة ماهرة.. وعندها فنيات اكتر من المراة المعلمة ذاتها .. والحريم بقن يقولن لي المراة نحن عايزين تحننا سارة .. والمراة الحنانة فرحت انو البت دي حتعيش امها .. وفعلا حصل ..البت لامن امها اتخرجت من المستشفى ..ورجعو بيتهم ..الحريم بقو يجوها في البيت بالعشرات .. وطول اليوم شغالة حنة ..وعاشت امها وقرت اخوها .. وعالجت امها لغاية ما بقت في امان الله .. والبت اتطورت.. لغاية ما اشترت بيت لمعلمتها من الحنة ..والان البت دي كبرت واتزوجت وعندها محل مشهور.. والعرايس بطلبوها طلب وحنتها بالشي الفلاني ..
وربنا كريم مابضيع عباده.. وزي مابقولو اهلنا ..ربنا ماشقالو حنكأ ضيعو ..
المقصود هنا من القصة دي ..انو مرات شغلك مع اصحاب الصنعة ..حتى لو ما مغطي معاك ماديا . يكفي انك تكسب خبرة وماتسمعو لي حكاية سبع صنايع والبخت ضايع .. ده كلام فاضي .. اذا عندك سبع صنايع مستحيل بختك يضيع ..
ونحن منتظرين الحاج ود الضريس يجي من السوق وعوض يطرح عليهو الفكرة الجديدة .. ونشوف الحاج رايو شنو؟
في امان الله .. الى اللقاء ..
 
 
 
 
 
 
    رد مع اقتباس
قديم 07-11-2015, 11:55 PM   #7

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل .
الحلقة 7
بقلم طارق اللبيب .
بعد الضهر كدا الحاج ود الضريس جا من السوق .. ريحتو كلها شمار وكسبرة .. وشخصيتو زول كاتم وكاضم .. وزول عامض غموض ماطبيعي .. الاربعة وعشرين ساعة ساكت .. لو حصلت مشكلة . كبيرة وهو كان حاضرا .. وكت تجي تسأله منها بقولك .. (حصل سوء تفاهم واتحلا ) .. بس كدا تاني ما عندو زيادة .. يعني شخصيتو مختلفة من عوض اختلاف مية في مية.. يعني شخصيتو بتشبه الى حد كبير شخصية الولد الاصغر.. الاسمو حافظ البقرا في جامعة السودان .. حتى حافظ ناس البيت مسمنو ..رمسيس على التمثال بتاع رمسيس الفي القاهرة ..
المهم الحاج ود الضريس دخل ..واستحمى وسأل عوض سؤال واحد بس .. (خالك كيفنو آجنا؟) ..
وعوض طبعا يعجبك في الرص .. وترتيب الكلام.. مكنة بس ..
والله يا ابوي .الحمد لله طبعا وكت مشيت من هنا.. لقيتو تعبان شديد .. وحالتو صعبة.. لكن الحمد لله ..هسي بقى في امن وامان.. ورجع شغله ومسك القدرة تب.. انا لامن اطمأنيت عليهو حتى جيت .. بعدين والله شغلي الاشتغلتو ليهو.. كان موفق شديد .. والله هو براهو قاعد يقول لي ماشاء الله الشغل تمام .. وبقيت بعرف بظبط الشغل ظبط غريب .. والله يا ابوي اتعلمت الشغلة دي.. وبقت لي هواية .. وهسي والله كان القى لي قدرة في البلد دي .. في اي محل والله اسوي البدع .. وهسع انا كنت منتظرك بي أخر صبر .. داير اشوفك كان تلقى لي دبارة..لانو مافي شغل مشى معاي لي قدام .. انا حاسي القدرة دي واقعة لي تب .. وبراك بتشوف اها قلت شنو؟
وعوض ينضم وابوهو .. خاتي ايدو تحت حنكو يعاين ليهو .. ومستغرب في الزول ده .. سألوهو سؤال واحد .. قال ليهو خطبة وقدم فيها طلبات ههه والله غايتو عوض ده .. زول تحفة ..
قال ليهو ياعوض .. انا هسي سألتك من خالك بس .. الدخل القدرة والفول والشغل شنو؟ ..
عوض قال ليهو يا ابوي الكلام .. جاب الكلام وانا لقيت الفرصة .. طوالي خشيت بي موضوعي ههه .. اها هسي ماقلت لي رايك في المشروع ده شنو؟..
قال ليهو والله مشروع كويس.. وان شاء الله مافي مشكلة بتدبر .. اديني فرصة يومين كدا اشوف البحصل شنو.
وعوض منتظر اليومين ..
بس حصلت حاجة في النص كدا لخبطت اي شي ..
تاني يوم او تالت يوم من عوض جا من مدني .. حافظ الحاج اخو عوض الصغير.. وهو في السنة الاخيرة في الجامعة .. رجع وحالتو ماكويسة كلو كلو .. ووشو مختوف .. وخشمو ناشف .. ومقلق قلق غريب .. ويدخل ويمرق.. ويتكلم براهو .. وشكلو خايف ومتوتر وبتلفت ..
وامو قعدت تعاين ليهو مرعوبة و خافت شديد .. وكوركت لي عوض .. عوض تعال شوف اخوك ده مالو ..
عوض جا جاري على امو .. لقاها جمب الاوضة البقعد فيها حافظ .. لقا حافظ قاعد في نص السرير .. ويهز في كرعيهو .. ويتحرك حركة غريبة .. زي الزول الخايف من حاجة ..
جا قعد جمبو .. قال ليهو انت مالك يا حافظ؟ .. وحافظ مابتكلم بس يهمهم .. بعد شوية بقى يجيب كلام لافي السماء ولا في الارض ..
مرة يقول ليهم انا متابع من السي أي اي .. ومرة يقول ليهم ناس الامن مراقبني .. والناس كلها متابعاني وعارفني مطلوب .. ومرة يقول ليهم في زول سجل اسمي مع ناس داعش.. بدون ما انا اعرف .. ومرة يقول ليهم انا عندي نبوة جاية.. وحاصلح العالم ..
ومابي الاكل والشراب .. وامو دي خاتة ايدها فوق خشمها وتبكي ..
وبتردد : كرعلي يا يمة والرمادة في خشمك يا مهدية بت العوض ..
وابوهو لمن جا خاف عليهو شديد .. وختفو وداهو الدكتور ..
وعوض معاهو .. وكل الفحوصات والتحاليل كانت سليمة ..
وحولوهم للطب النفسي والعصبي .. وامو دي بتبكي زي المات ليها زول .. ورفضت حكاية الطبيب النفسي دي .. طبعا في ناس عندهم عقدة من الطبيب النفسي .. وبعتبرو مجرد التفكير في الطب النفسي معناها خلاص ده مجنون .. وده مفهوم خطأ وتخلف .. لانو في الدول المتقدمة .. حتى الناس الكويسين .. بكون عندهم متابعات مع الاطباء النفسين .. حتى في المشاكل العادية .. والتاثيرات البسيطة..
الزول بمشي براهو للدكتور النفسي والاستشاريين .. وبشوفوه موضوع عادي ..
المهم مهدية بت العوض كانت خايفة وحزينة حزن ماطبيعي .. لانو الحاله دي ماحصلت عليهم قبل كدا .. لافي اسرتها هي لافي اسرة ابوهم .. وطبعا اول مافكرت في شيوخ البخرات والمحايات .. والحاجات الغريبة دي .. ابوهو كان زول واعي ورفض الامور دي جملة وتفصيلا .. لانه سامع من العلماء انها غير جائزة ..
واصر يوديهو للطب النفسي .. وداهو فعلا للدكتور .. والدكتور اول ماسأل من احتمالية تناول المخدرات .. قالو ليهو ده مستحيل .. لانو حافظ زول ملتزم .. ولاسجاير ولاسعوط .. حتى اصحابو ناس ملتزمين ومتدينين .. المهم ابوهو اصر يواصل ليهو علاج الطبيب النفسي .. بس العلاج كان بعمل ليهو تخشب في الجسم .. وتقل..ونشاف في الريق.. واكل كتير ونوم كتير..
لكن الحالة ياها الحالة ..غير انو بقى خامل والحركة الكتيرة خفت ..
وامو اصرت تبخرو بالبخرات في غياب الاب .. وعوض معارض في الموضوع ..
حتى عوض يوم فرتك ليها بخرة قدامها .. لقاها كلها طلاسم ورموز وكلام غريب .. وتسطير وجداول .. وتربيعات .. وهي قالت ليهو مالك ومالا امكن دي اسرار الشيوخ ..

طبعا فعلا دي ياها الطلاسم والرموز دي .. دجل وشعوذة محرمة ولايجوز العلاج بيها .. وهي علوم واوفاق .. تتعلق بالجن والشياطين .. زي ارقام التلفونات والبريد الاكتروني عندنا .. واي رقم ووفق يمثل نداء . لملك من ملوك الجن .. والتحريم في قوله تعالى ( وانه كان رجال من الانس يعوذون برجال من الجن فزادوهم رهقا") ..
لكن الحاجة مهدية كان مخها مقفول على الثقة في الشيوخ ..

طبعا" اسرة عوض في البداية كانو داسين حكاية المرض دي .. وخاتنو في غرفتو براهو ..
عشان في بعض الاسر بتعتبر المرض الزي ده عيب .. وفي المجتمع .. بكون الزول ده عندوسمعة سيئة.. قد تكون سبب في فشل حياتو ومستقبلو.. حتى لو بقى كويس .. وده برضو مفهوم والعيب هنا في نظرة المجتمع للمريض النفسي .. والمفهو الخطأ خطأ المفروض الناس تحاربو بشتى السبل والوسايل .. والناس المفروض تتعايش مع اي مرض كان .. لانو امتحان من الله واذا احب الله قوما ابتلاهم .. الناس حقو تستحي من الغش والسرقة والتبرج والانحلال .. ماتستحي من العيا الجاي من ربنا ..
المهم غايتو مهدية بت العوض .. شبعت الولد في الدخاخين .. ومافي اي تحسن .. بالعكس حافظ كل يوم ماشي في تدهور .. حالتو وصحتو والحبوب عملت ليهو زيادة في الوزن .. وعو ض بقى متفرغ تماما . مع اخوهو في البيت ومراعيهو .. ونسى حكاية القدرة والفول ديك كلو كلو..
عوض في يوم من الايام حكى لواحد من اصحابو المقربين جدا .ساكن في الشارع الفاصل بين 13 و14 .. حكى ليهو مشكلة حافظ .. والعلاجات والبخرات الماجايبة غير الوهم والمرض .. قال ليهو والله يا عوض.. كان في واحد بعالج بالقران هنا في التاسعة ..وعلاجو بالرقية الشرعية .. يعني قرأن بس.. لافيهو بخرة ولامحاية .. وانا شفت بي عيني .. الناس بجو كيف .. وبعد العلاج بكونو كيف .. دي حاجة ربنا بسألني منها .. بس والله هسي ماعارفو رحل وين.. لانو كان مؤجر هنا ..
قال ليهو ياريت يافواز تشوف لي الزول ده.. والله بالطريقة دي .. حافظ اخوي بدمر الى الابد ..
قال ليهو والله بسأل ليك منو .. لانو في ناس ببقو ليهو في التاسعة ذاتها ..وممكن نسأل الجيران .. يازول مافي مشكلة انا باكر بجيك بالنجيضه .. وفعلا فواز عرف انو الشيخ ده الان في بحري .. وعرف الوصف تمام .. ومشى كلم عوض ..
المهم عوض مشى حكى للوالدة الموضوع ده .. وهي قالت ليهو والله انا ذاتي سمعت بيهو الاسم ده .. بس ماحصل مشيت .. المهم تاني يوم طوالي ركبو مشو ليهو في بحري ..
وحكو الحاصل كللللو .. وعوض طبعا" ييعجبك بحكي في الموضوع بالتفاصيل الدقيقة .. وماخلا حاجة ..
حتى طبعة حافظ الكانت قبل المرض حكاها .. وما ادى الحجة اي فرصة تحكي ..
وحافظ قاعد يتلفت ويتفتف .. ويتكلم براهو .. زي الكأنو في زول قاعد جمبو وبشتم فيهو .. وهو برد في الشتايم بس الكلام ما مفهوم . ومتوتر تورتر غريب .. اول كلمة قالا لمن الشيخ سأله .. قال ليهو بتحس بشنو ياحافظ ؟
قال ليهو انت عندك اجهزة تنصت؟؟ .. انت شغال مع المخابرات الامريكية ؟؟ والشيخ بدا يقنع فيهو.. انو مافي حاجة من الحاجات دي .. وبدأ القران الكريم يصدح في الارجاء ويفعل الافاعيل .. والولد من اول جلسة بدا يستفرغ في المصايب والبلاوي من بطنو حاجات سود وحاجات مخلوطة بي دم حكاية الماشافا مابصدقها .. نسأل الله السلامة .. وبدا حافظ يتكلم في كلام غريب .. اسلوب مابشبه اسلوبو .. وذكر اسم بت معاهو في الجامعة .. وكانت جلسة عبارة عن عجايب وغرايب .
المهم بعد نهاية الجلسة حافظ جاتو حالة اشبه بالهبوط .. وسكووون .. والشيخ قال ليهم ياجماعة الزول ده شارب سحر والحمد لله الان خرج من بطنو زي ماشايفين .. بس في حاجة مهمة عايز اقولا ليكم .. اسم البت المذكور في الجلسة .. لايعتمد ولايصدق .. لان الناطق على لسان حافظ .. هو الشيطان خادم السحر .. فكونو نصدق كلام الشياطين في انسانة مسلمة .. فدا مامن العدل .. عشان كدا الكلام ده ما تتكلمو بيهو نهائي .. مهدية قالت ليهو والله ياشيخنا نحن اساسا مرض حافظ مانضمنا بيهو .. ولا شغالين بالضرانا منو .. والضرانا خليناهو لي الله .. المهم ولدنا يبقى كويس .. قال قال ليها ان شاء الله .. بس انتي ياحجة كتري الدعوات .. دعوة الوالد مستجابة .. وتقرو ليهو المعوذات صباح ومساء .. وحدد ليهم جلسة تانية بعد يومين .. وحافظ تعبان وساكت ساااااي ..
وساقوهو للعربية متكل .. ومامعروف بعد يفيق من تعبتو دي بكون كيف . نشووووووووف
الى اللقاء ..
 
 
 
 
 
 
    رد مع اقتباس
قديم 07-11-2015, 11:56 PM   #8

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل .
الحلقة 8
بقلم طارق اللبيب .
لوملاحظين انو السحر المعمول لي حافظ مقصود به المحبة والجلب.. لكن المشكلة كان تأثيرا مغايرا .. السحر سبب ليهو هوس وقلق وخوف وتخاييل واوهام .. لان السحر اصلا اهوج .. مرات تمشي مراة تعمل ليها سحر لي راجلا.. عشان مايتزوج فيها .. يقوم الراجل يجيهو سرطان .. واحدة تمشي تعمل ليها سحر لي ولدا عشان يطلق مرتو .. يقوم السحر يعمل ليهو صرعة .. والسبب ان السحرة في بلدنا ماعندهم خبرة كافية .. وقاعدين كنب ساي .. يعني حتى السحر مابعرفو يظبطوهو كويس ههه ..
على كل حال .. عشان مانفصل في حكاية سحر حافظ كتير.. الزول بعد ستة ايام بقى طبيعي .. بعد استفرغ كل السحر الشربو .. والاستفراغ كان مستمر تلات جلسات كل مرة يقل حتى انتهى تماما .. والولد رجع لطبيعتو العادية .. بفضل الله وقوته .. واوقف العقاقير بالتدريج .. لان هذه العقاقير النوعية دي ذات تأثير ادماني ..
عوض كان سعيد .. والوالد كان متابع معاهم كل مراحل العلاج ومحنة وعدت الحمد لله ..
بعد يومين عوض مشى شحن رصيد.. واتصل على صاحبو صلاح في مدني .. وبعد التحايا والاكرام ..
قال ليهو ياخي انا بٍسأل من ميادة زولتك .. كيف الان ..؟
صلاح قال ليهو والله ميادة كل يوم نقول بتموت الليلة دي .. طبعا خلاص بقت في مراحلا الاخيرة ..والله انا متأثر تأثير ما تتصورو .. البت عايشة على الحبوب . بس .. ودمها مرات يصل ادنى مستويات الخطورة
وكل بعد كم يوم ينقلو ليها دم ..
قال ليهو انت موش قلت كان في زول بقرا ليها قران ؟
قال ليهو والله وقفوه لانها بقت تتعب في الجلسات ومافي فائدة ..
قال ليهو اها في القراية الظهر ليها شنو ؟ سحر ، عين ، مس شنو بالضبط ؟ (عان عوض كمان بقى خبره هه) ..
قال ليهو والله ماعرفنا اي حاجة ودي المشكلة ..
قال ليهو يازول انا جاييك بي بشارة والله ..
عارف حافظ اخوي عيا وحصل ليهو وحصل ليهو .. وديناهو لفلان وحصل حصل .. المهم حكا ليهو كل المعاناة بالتفصيل ..
وقال ليهو ياخي انا بنصحك كلم الناس ديل .. خليهم يجيبوها لينا في الخرطوم .. انا بوصلهم للشيخ ده .. والحكاية دي على مسؤليتي .. وانا بديكم تلفونو واتصلو اسألوهو ..
ومن هنا بدأت قصة السحر القاتل .. وعشان نكون عندنا المام كامل بموضوع الرواية لازم نفصل ..
• اها اتصل الولد الاسمو مصعب على الشيخ وشرح ليهو الحالة .. الشيخ قال ليهو ممكن تقدر تجاوبني على بعض الاسئلة قبل ماتجيبوها لي عشان افهم حاجة ..
قال ليهو دقيقة اديك الوالدة ..
الشيخ : ـ السلام عليكم مرحب بيك ياحجة ..
قالت ليهو عليكم السلام مرحب بيك حبابك والله ..
قال من متين والبت دي بتعاني من الموضوع ده؟؟ .. قالت ليهو والله هسي مشت ليها لي شهرين ..
قال ليها ممكن أسالك من قبال مايجيها المرض ده .. في بعض الاعراض عندها ولالا؟
هل كانت بتحس بي خلعة في النوم ؟ قالت ليهو نعم
كانت بتشوف منامات مخيفة .. قالت ليهو نعم ..
كانت بتحس بي ضيق وخنقة زي المقفولة في علبة .. قالت ليهو والله لامن تقعد تبكي .. كان عندها سرحان ونسيان وعدم تركيز . قالت ليهو صاااح ..
قال ليها ياحجة جيبو البت دي سريع مهما حصل ..
قالت ليهو حاضرين ان شاء الله .. بكرة كان الله ادا العافية نحن معاك ..
طوالي يازول اتصلو على اهلهم في الديوم الشرقية .. قالو ليهم نحن بكرة جايبين ميادة وجايين .. للعلاج بالقران .. واتصلو على صلاح .. وصلاح اتصل على عوض.. والتلفونات بقت تتخابت .. والناس كلهم باقين استاند باي.. لوصول ميادة للخرطوم للعلاج ..
صلاح قال لي عوض .. انا ياعوض لازم اجي مع الناس ديل.. لكن ما ح اقعد معاهم في الديوم .. انا بجيك في الثورة .. عوض قال ليهو ياسلااام ياخي .. والله ده احلا خبر.. ياخي والله الثورة وامدرمان كلها تتشرف بيك .. وريني بتصل متين ؟ عشان اتلقاك في الموقف ..
قال ليهو بس انت لاقيني في الشهداء امدرمان .. انا عندي غشوة لزول في الشهداء وبعداك نمشي البيت ..
اها خالك وبتو ماعنك منهم اخبار ؟ .. قال ليهو كدي انت اصل خليهو خالي وبتو .. انا ديل ناس مسحتهم من فوائل حياتي وخلاص ..
قال ليهو طيب انسى .. باكر نتلاقى ان شاء الله .. بيناتنا التلفون ..
وباكر عوض قام من الصباح.. بضرب لي صلاح.. انتو وين؟؟ .. قال ليهو نحن يادوب اتحركنا ومتابع معاهم .. واتاكدو من وجود الشيخ في بحري .. وحجزو للبت .. وكانو خايفين من الزحمة والانتظار.. لانو بالجد البت حالتها لاتستحمل ..
حتى عوض اتصل واكد على الكلام ده .. وكان مهتم اهتمام شديد .
اها يازول المهم بي قدرة قادر .. ومن عناء السفر وصلو الديوم الشرقية .. واخدو المواعيد على الساعة 4 .. يمشو بحري .. الناس الفي الديوم الشرقية دي ناس خالتها وعندهم بتهم دكتورة بتاعة امتياز
وقعدت تتناقش معاهم .. هسي عليك الله جايبين البت من هناك عشان يقرو ليها قران ؟.. القران في مدني مافي ؟.. ده شنو الجهل والتخلف ده ؟ .. البت معروف مرضها انيميا حادة .. وبتاخد في علاج . واي حركة مامن صالحها .. خالتها ام ميادة قالت ليها .. اسمعي يا زيزو خلي دكترتك لي روحك نحن عارفين بنسوي في شنو ..
البت يهدي بنعالج فيها شهرين .. مابقت كويسة ..
قالت ليها كان تجيبوها للدكاترة الهنا في الخرطوم .. ام ميادة (ختتها ليها في حنانها) قالت ليها .. الدكاترة في مدني مافي ؟؟ ..
طيب .معلومة مهمة شديد ..
طبعا" ياجماعة اقول ليكم الكلام ده في الموضوع حسب مانقلته مجلة الجمعية الطبية الامريكية ..
وانا بقولو بتصرف واختصار .. الانيميا .. هي فقر الدم ..
نقصان في الهموقلبين .. وتناقص كريات الدم الحمراء .. مما يعوق وصول الاكسجين الى اجهزة الجسم الحيوية .. بكفاءة طبيعية ..
واعراضه ..
ضيق في التنفس مع بذل أقل مجهود
• الشعور بالتعب الشديد
• شحوب الوجه
• عدم القدرة على تحمل الطقس البارد.
• النبض السريع وخفقان في القلب.
• الصداع. الدوار الاستفراغ وغيرها ..
وفي النهاية يؤدى الى هبوط الدورة الدموية وفشل القلب .
ونهاية الحياة ..
اسبابو .. قد يحصل من نزيف داخلي .. او من ازياد النزف في الدروة الشهرية .. او نقص في الحديد ..
أو تكسير كرات الدم الحمراء .. ونتكلم عن الاخيرة دي لانها بتهمنا في القصة ..
خلايا الدم الحمراء عادة بتعيش لمدة 120 يوماً.. قبل ما يقوم الجسم بتكسيرها واستبدالها.
وبعض الأمراض الوراثية التي تؤثر على الخلايا الحمراء أو الهيموجلوبين قد تؤدي إلى زيادة سرعة تكسير الخلايا نتيجة خلل في الجهاز المناعي للجسم.. او لاسباب غير معروفة ( وده هنا ياهو المابقدرو عليهو الجماعة ديل .. )
وطبعا .. علاج فقر الدم بيعتمد على السبب الكامن وراءه. قد يحتاج المريض إلى تحسين النظام الغذائي الخاص به.. أو إذا كان هناك نقص شديد في فيتامين ب 12، فقد ينصح الطبيب بتناول مكملات من الحديد وحامض الفوليك أو الفيتامين.
وفي حالات فقر الدم الشديد، قد يحتاج المريض إلى نقل دم وفي حالات الأمراض المزمنة .. يجب تعويض الهرمون المحفز لإنتاج الخلايا الحمراء.
المهم دي معلومة كدا في النص عشان يكون عندنا فكرة عن الانيميا وفقر الدم ..
وبالرغم من كل العلاجات دي .. برضو حالة ميادة ما اتحسنت .. وكت الدكتورة بت خالتها شافت العلاجات حقاتها .. لقتها ياها صحيحة مية في المية .. واستغربت في التكسير المستمر .. ليه ياربي ..
قالت غريبة والله .. خالتها ام ميادة قالت ليها كل الدكاترة الفي مدني .. بقولو غريبة والله بتاعتك دي.. عشان كدا نحن جينا للعلاج بالقران ..
قالت ليها مافي مشكلة ياخالة انا ذاتي ماشة معاكم احتمال يكون عندي حاجة كدا ولا كدا ..
قالت ليها خلاص اجهزي الساعة 4 مواعيدنا معاهو ..
وفعلا الساعة 4 مشو للشيخ ولقوه حاجز ليهم حجز استثنائي عشان عوض كلمه بي حالة البت .. وصلت البت .. حالتها تخلي الكافر يبكي .. جسمها هزيل وعيونها مغورقات . ووشها شاحب .. وكفيها ديل بيضاء شديد .. وشفايفها ناشفة لامن مغبشة ..
ومركبين ليها فراشة جات بيها من مدني .. وماشي بالتلتلة اخوها من جنبة . وامها من جنبة ..
بعد السلام وحمدلله على السلامة .. وبدا الشيخ يسأل في البت ..
السلام عليكم ميادة بتقدري تجاوبيني على الاسئلة دي؟؟ بسيطة بس..
قالت ليهو ايوة ان شاء الله .. وصوتها ضعيف ورايح رايح .. زي الزول الكان في المظاهرات .. وجا مضروب ..
المهم سألها زي كم سؤال كدا .. عن اعراض لامراض هو بعرفها براهو ..
ومن ضمن الاسئلة قال ليها انتي لمن تكوني براك بتحسي بشنو ؟ قالت يهو بحس باني عايزة اموت بس ..
قال ليها قبل المرض .. كنتي بتشوفي شنو .. في النوم بشكل متكرر .. قالت ليهو اكتر حاجة بشوف الناس الميتين .. اهلي وعمي اتوفي قبل تلات سنة .. واخت صحبتي .. ماتت في حادث .. وبشوفهم كانهم احياء .. دايما دايما بشوف الميتين نادرا اشوف الاحياء ..
وبشوف المقابر كتير .. وشكل القبور والشواهد المكتوب عليها نسألكم الفاتحة ..
هنا الشيخ قال ليها وااااضح خلاص نبدا ..
طبعا ياجماعة دي بالضبط اعراض السحر القاتل المدفون في القبور ..
اها قبل بداية القراءة ..امها قالت ليهو عارف يا شيخنا نحن الوقفنا من القراية .. انو البت دي بتتعب في القراية تقرب تموت ..
قال ليها اطمئني ياحجة بنديها الجرعة الخفيفة .. والدكتورة ديك تعااااين ..
بعد بدأت القراء والقراءن نشر عبيره .. في الافاق .. وتنزلت رحمات الله من السماء تترا .. (بمدلول قوله فاستمعوا اليه وانصتو لعلكم ترحمون) .. وبدأت العجائب تظهر في الافق .. وتعال شوف الحصل .. دخلت البت في غيبوبة كانها ميتة الى نهاية الجلسة ..
وبعد نهاية الجلسة بدأت تتكلم بصوت عال ..وغاضب جدا .. (( انا فلانة الفلانية .. انتو مابتعرفوني .. انا طلبتها لي ولدي.. في حفلة ناس فلان في كسلا. وهي ابت .. وانا مشيت عملت ليها العمل عند الفكي .. قلت ليهو زي ماحرقت قلبي .. انت تحرق دمها .. وياهودا دمها اتحرق .. انا مابخليها الا تموت ..
انتو لو وديتوها لاي مكان ماح تبقى كويسة .. دي خلاص بقت في عداد الاموات .. ...!! معقول ياجماعة!! في مسلم بعمل كدا في انسانة مسلمة .؟؟ نسأل الله العافية ..
الى اللقاء ..
 
 
 
 
 
 
    رد مع اقتباس
قديم 07-11-2015, 11:59 PM   #9

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل
الحلقة 9
بقلم طارق اللبيب ..
ـــــ
نحن في الحالة دي وفي الوضع الغريب ده البت امها مهجومة واخوها متنشن ..
فجأة وبدون مقدمات البت الدكتورة بدت ترجف وترتعد.. ودموعها شوووو كابات .. الشيخ ماركز معاها كتير .. لان السحر القاتل كان مسيطر على اهتمامو .. الحالة بتاعة ميادة كانت صعبة وحساسة .. والشيخ ما رد على الكلام الطالع من ميادة .. ولا سأل اي سؤال .. استمع للكلام ده وسكت ..
بعد اربعة او خمسة دقايق .. ميادة فتحت عيونا .. وما كانت تعبانة.. لان الجلسة كانت من العيار الخفيف ..
بس قالت زيزو مالا؟ ..زيزو دي الدكتورة اسمها عزاز .. والدكتورة فتحت عيونا وقشت دموعها.. وظاهر عليها مرعوبة من الحست بيهو في جسمها ..لكن بتحاول تخفي .. (طبعا" الدكتورة عندها عارض قدر الضربة) ..
قالت ليها مافي شي ياميادة ..انا كويسة .. انتي كويسة؟ .. قالت ليها كويسة الحمد لله ..
الام طوالي قالت ليهو في شنو ياشيخنا؟؟ .. قال ليها ميادة عندها سحر.. لكن ان شاء الله بنتهي .. ماقال ليهم سحر قاتل .. لانو الحريم ممكن الخوف يكون سبب كافي للموت .. ..
وقال ليهم ماتشيلو اي هم.. ربنا قال (ولايفلح الساحر حيث اتى) .. وقال (ماجئتم به السحر ان الله سيبطله ان الله لايصلح عمل المفسدين ويحق الله الحق بكلماته ولو كره المجرمون ) زي ماسمعتو الايات في اثناء القراءة ..
قالت ليهو طيب العلاج شنو ؟ قال ليها العلاج كلام الله العظيم بس اصبري ياحجه . النسأل ميادة من الحاصل ..
ميادة قالت والله انا حاسة نفسي زي الواقعة لي بير .. وشفت حاجات كتيرة وحسيت بي خوف غريب ..
قال ليها ما متذكرة ولاحاجة من الشوفتيهو تحكيهو لينا .. قالت ابدا والله . لكن حاسة بي حاجة في ضهري طقت شديد ..انا قلت ضهري انفتح .. قال ليها .. الله اكبر دي اول البشاير يا ميادة ..دي عقدة انفكت ..ان شاء الله تكوني كويسة باذن الله تعالي ..
هسي انتو امشو البيت.. خلوها ترتاح وتاكل فواكة بسيطة .. ولازم تقري سورة الفلق كدا وسورة الناس كدا ..
واصلو ابا يسأل الدكتورة دي عن اي شي ..
لانها قبيل اول ماجات قعدت في الجلسة ..جات بي نفسيات قرفانة.. وقعدت قعدة استفزازية .. خلفت كراعها .. وربعت ايديها .. وبقت تعاين معاينة استفزازية.. زي الزول المامقتنع باي حاجة ..والشيخ عامل رايح ..
المهم الجماعة طلعو دي الجلسة الاولى .. وكانت القراءة كشفية عامة للسحر والعين والمس ..
عوض وصلاح جو من الثورة متاخرين بعد الجلسة انتهت.. ولاقوهم برة وسألو من الحاصل .. وحكو ليهم الحاصل .. صلاح وعوض دخلو للشيخ يسلمو .. وناس ميادة مشو الديوم الشرقية بالامجاد ..
وهم في الشارع الدكتورة قالت .. والله انا حصلت علي حالة.. قربت اصرخ وكنت ماسكة نفسي بالجلالة .. كان القراية استمرت دقيقتين تاني.. كان جاتني غيبوبة .. ده شنو ده الحصل لي ده ؟
والله ماكنت مقتنعة من اساسو .. وام ميادة تعاين ليها .. واصلو ابت تتكلم معاها .. بس قالت ليها خلاص لازم تواصلي علاجك انتي عيانة يابتي ..
ميادة كانت مرتاحة نفسيا ..وحاسة بانها عندها امل تبقى كويسة ..
ومن الشارع اشترو ليها فواكة.. وصلت البيت واكلت وشربت عصير.. وما استفرغت ..ونامت وقامت احسن ..
• بس قالت ليهم انا شفت في الحلم مناظر زي الشفتها في جلسة القران ..
بس شفت مقابر جمبها جبل .
وكانت مواصلة في الفايتميات وحبوب الحديد والحاجات دي بانتظام ..
اها وكت جات في الجلسة التانية كانت حالتها احسن .. وماشة كويس .. والشيخ استبشر خير .. وقال ماشاء الله ميادة الليلة احسن . بس امها قالت ليهو والله ياشيخنا كتير بتتحسن ونقول بقت كويسة ..فجأة تنتكس وتبقى على الموت .. قال ليها ان شاء الله تاني مافي انتكاسة ..
والدكتورة جات معاهم الجلسة التانية بررضو.. وكانت المرة دي مختلفة في طريقة قعدتها ..وفي طريقة نظرتها وكلامها.. (اها ماقلتو مامقتنعين ّ!!)..
المهم بدت القراية .. وميادة من اول قراية ايات ابطال السحر تعبت بس التعب اخف .. والصوت الكان بتكلم جواها بدا الكلام في اثناء القراءة ..كان مرهق وتعبان .. واقل غضبا .. وكان يبدو يائسأ ..
وبتقول .. ياناس .. ياشيخ تعبتوني .. وخربتو اي حاجة .. خلاص فكوني انا طالعة .. انا ذاتي بقيت عيانة فكوني انا طالعة ..
هنا الشيخ رد عليها ..قال السحر ده مكانو وين؟؟ .. قالت مدفون في كسلا .. في مقابر الختمية .. مقابر الضريح.. الضريح بتعرفوهو .. ضريح سيدي الحسن ..
امشو طلعوهو بطلوهو ..وبتبقى كويسة.. انا ذاتي زهجت ومليت ..
شنو شغالين لينا فلق فلق فلق .. ونقاثات في العقد ..وبتاع .. دي اكتر سورة نحن بنكرها ..
فجأة كدا البت فتحت..
واخوها وامها ديل حاصل عليهم ذهول غريب ..
والدكتورة واقعة على الكنبة زي النايمة لسع مافتحت ..
وكونها اتاثرت في الجلسة المركزة على السحر.. معناها برضها مقشوطة بي سحر.. مسكينة يادكتورة زيزو .. بس ربنا بحبك جابك للعلاج غصبا" عنك ..عشان يفرج عنك ..
كنت عمرك كلو حتكوني عانس ..الا ان يشاء الله ..

المهم خلونا مع ميادة .. ميادة قالت والله انا شفت المقابر دي تاني يا امي .. ووصفت مقابر الختمية وصف دقيق .. وقالت شايفة دخان طالع من قبر .. والقبر دة واقع في الجيهة الشمالية الغربية .. ووصفتو وصف عجيب .. يعني بالضبط ..
حتى اسم صاحب القبر التالت منه .. والغريبة القبر ده لافوقو شاهد ولافوقو كتابه ..
الشيخ قال ليهم يلا ياجماعة دايرين زول يكون شجاع.. ويمشي يشوف الحاصل ده .. يطلع المصيبة دي يجيبها ..
اخوها قال ليهو بسيطة.. هسي انا بتصل على ياسين سعيد كدا ماعارف .. اوصف ليهو يطلعو ..
ويرسلو لينا بالباصات ..
الشيخ قال ليهم لو طلع الوصف حقيقة .. والسحر اتلقى خليهو يدخلو في كيس.. او يقفلو في علبة محكمة . ويرسلو لينا هنا ..
بعد شوية الدكتورة فتحت وبقت تتلفت .. وقالو ليها حمد لله على السلامة .. مالك ؟؟ قالت والله ماعارفة الحصل لي شنو ..
المهم بقو طالعين بعد نهاية الجلسة والمفروض الجلسة التالتة يجو .. ويجيبو معاهم السحر .. ده لو اتلقى حقيقة ..
بعد هم طلعو الدكتورة ماطلعت طوالي .. وقفت شوية وقالت للشيخ .. والله ياشيخ انا عندي مشكلة .. وما كنت قايلاها ممكن يكون ليها علاقة بالعلاج ده ..
قال ليها مشكلتك شنو؟ قالت ليهو والله قدر مايجيني عريس .. ويكون ماشي كويس .. فجأة كدا يتلاشى بدون اي اسباب مقنعة .. والغريبة انا مابرفضو .. بس هو بقطع اتصالاتو وتاني بقعد يتهرب .. وفي واحدين بواجهوني عديل يقولو لي لو جاك زول ماتترددي .. والله لمن اتعقدت من روحي .. وزي ماعارف العمر بيمشي .. والناس ذاتهم اكلو لحمي ..
الشيخ قال ليها ان شاء الله فرجت باذن الله .. بس ماتنسي الاستخارة في اي زول يتقدم ليك .. وواصلي جلساتك لانك عندك سحر عوارض لمنع الزواج زي ما ملاحظة .. لغاية مايخلص تماما ..
قالت ليهو السحر العملو لي منو؟.. قال ليها العلم عند الله ..وحتى لو انا عارف ماممكن اقول ليك .. لانها دي فتنة المهم تتعالجي وتتحصني .. والزول الضراك ربنا كفيل بامره .. قالت ليهو ونعم بالله .. وطلعت .. بنفسيات طيبة والحمد لله ..
عوض وصلاح متابعين والله بي كل جدية.. واهتمام ويوميا بجو من الثورة يشوفو الحاصل شنو ويرجعو.. ولمن سمعو بي حكاية السحر المدفون في كسلا ..قالو لازم يسافرو كسلا يطلعوهو هم بي نفسهم .. اخو ميادة قال ليهم لالا .. اول حاجة مافي زمن تسافرو وتجو راجعين .. نختسر الطريق ونضرب لي ياسين .. بعدين ياسين ديك بلدو ..وبعرف يمشي المقابر متين .. وفي سرية تامة يتصرف ..
الكلام ده وهم طالعين من الشيخ وجنب الباب بتكلمو .. اها يازول وكت وصلو البيت مصعب اتصل على ياسين .. في كسلا هوود خالو باللفة كدا .. ياسين ده اخو الكان عرس السنة الفاتت وفي زواجو حصلت القصة .. لي ميادة.. والمراة لاقتها هناك .. يعني السحر مدفون ليهو اكتر من سنة .. وما اتنفذ الا قبل شهرين بس .. شفت كيف؟ ..
للمعلومية السحر عندو فترة بناء .. او بمصطلح طبي اكتر بنسميها فترة حضانة .. قد يكون السحر مدفون فترة سنة ما ياثر .. ويبدا تاثير بعد كدا .. لكن نادرا ما ياثر السحر في نفس اللحظة الاندفن فيها .. طيب ..
اها اتصل مصعب على ياسين وقال ليهو خت بالك معاي كويس .. ميادة حاصل ليها كيت كيت .. ورصة ليهو القصة من اولها لي اخرها.. بس ماقال ليهو اسم المراة العملت السحر ..على حسب وصية الشيخ ..
قال ليهو انت تتصرف وتمشي تطلع الحاجة دي .. وتختها في كيس او علبة ..وترسلا لي مع البصات بتاعة كسلا مع اي زول بتعرفو انا بلاقيهو في الموقف ..
ياسين قال ليهو طيب الموضوع ده مابضرني .. والله انا لاوزت عديل يامعلم .. قال ليهو افو .. حتى لو بضرك بتخلي اختك تروح عشان انت خايف .. قال ليهو ابدا والله .. بهظر .. قال ليهو بعدين ده ما معمول بي اسمك مابعمل ليك حاجة انت ..
قال ليهو خلاص انا هسي بمشي المقابر .. ولمن اكون هناك بديك تلفون توصف لي وصف دقيق ..
وياسين ركب طوالي مشى الختمية ومع اللفة بتاعة المقابر نزل طوالي واتصل على مصعب ..
مصعب سلم التلفون لي اختو ميادة قال ليها ده ياسين ود خالك سعيد في كسلا وصفي ليهو بالحتة ..
والبت مسكت التلفون وفجأة صوتها اتغير زي الصوت الكان في الجلسة يعني استحضرت .وتعال شوف ..
الى اللقاء ..
 
 
 
 
 
 
    رد مع اقتباس
قديم 07-12-2015, 12:00 AM   #10

هيثم حاج على

مشرف إداري
 
الصورة الرمزية هيثم حاج على

 









هيثم حاج على غير متصل
افتراضي رد: رواية السحر القاتل لـ طارق اللبيب

 
السحر القاتل ..
الحلقة 10
بقلم طارق اللبيب ..
ـــــــــــــــــــــــــــــــ
ميادة ماسكة التلفون وتهمهم .. وبتقول ليهو دقيقة دقيقة ماتطلعو .. دقيقة دقيقة .. وهو بقول ليها ميادة كيف حالك؟ .. قالت ليهو ميادة تطلع عينك ياغبي ..
قال ليها .. بسم الله الرحمن الرحيم.. يابت مالك؟ .. قالت ليهو ملالة تملك .. وجدعت التلفون .. في السرير .. مصعب شال التلفون وقال لي.. ياسين ياسين.. معليش ياخي البت دي ماطبيعية.. انتظر بس دقايق ماتمشي ..
قال ليهو ياخي والله انا خوفت وشعرجلدي كلو قام ..
قال ليهو اصبر بس شوية عليك الله.. برجع ليك انا وقفل منو التلفون ..
اها اول ماقفلت المكالمة البت رجعت طبيعية .. اخوها قال ليها ميادة حاولي استجمعي قواك ..ووصفي لي انا بكلمو ..
قالت ليهو حاضر ..وبدت توصف لي اخوها حفظ الوصف واتصل عليهو تاني .. المهم في النهاية الولد قال والله الحتة دي بالضبط مالقيت فيها حاجة .. بس لقيت خيط صغير كدا مربط ..
قال ليهو فتش كويس .. ماتستعجل والخيط ده ذاتو ماتجدعو احتمال يكون ياهو المصيبة ذاتها ..
المهم الولد ياسين فتش ومالقى حاجة غير الخيط ده ..
مصعب قال ليهو اصبر .. دقايق .. برجع ليك بتلفون خليك في مكانك .. خمسة دقايق بس
مصعب اتصل على الشيخ ..قال ليهو الزول الفي كسلا لقى في المقابر خيط مربط ..هل ممكن يكون ياهو السحر ؟؟
الشيخ قال ليهو .. والله الله اعلم.. بس انت ممكن تتأكد منو بي طريقة .. اللهي انك تقعد جم ميادة وتقول.. اللهم ابطل السحر المعقود.. بصوت عالي سبعة مرات .. لو اتاثرت معناها ياهو .. لو عادية معناها مالقيتوهو ..
وفعلا مصعب قعد جمبها يقول اللهم ابطل السحر المعقود .. اللهم ابطل السحر المعقود ..بصوت عالي .. في المرة التانية بس البت صرخت.. امو جات جارية من جوة بتقول ليهو ده شنو يا مصعب داير تكتلها .. ؟ ..
قال ليها دقيقة يا امي بفهمك .. ورجع طوالي لي ياسين بالتلفون ..قال ليهو مبروك يا عمك.. الموضوع ياهو ..
قال ليهو مقعول الخيط ده هسي سبب المرض كلو
؟؟ .. والله ماقادر اصدق .. والله هسي انا قربت اجدعو .. انت عارف البتاع ده ولا مدفون كويس .. طرفو برة في السهلة .. مصعب قال ليهو اوعك تفرط فيهو.. بس شوفلك كيس دخلو فيهو .. ودخلو في علبة واقفلو تماما ..ورسلو لينا مع اي زول ..
وبي كدا انفتح باب الامل الكبير في وش الاسرة دي .. وسبحان الله ..
بس لسه السحر ده ماممكن ينتهي الا تتفك العقد دي واحدة واحدة .. او بطريقة انهاء التاثير عن الهدف ..
ودي بوريكم ليها بعد شوية يعني شنو. انهاء التاثير من الهدف؟
.. المهم ياجماعة الحصل في القصة انو الولد اتاخر يومين تقريبا ما رسل الامانة من كسلا..
وكل مرة يقول مالقيت زول اثق فيهو .. واظنو لقى واحد بس من اصحابو .. وداك خاف لمن كلمو قال ليهو ده كدا كدا ..ورفض يشيلو .. قاليهو امشي كدا ياعمك.. نحن الفينا مكفينا هه
الجماعة جو استشارو الشيخ ..وقالو ليهو ممكن نسافر نجيبو ونجي .. قال ليهم مافي مشكلة انتو بتثقو في الزول ده الاسمو ياسين ده .. قالو ليهو طبعا .. ثقة عمياء
قال ليهم اضربو لي ليهو وادوني ليهو في التلفون ..
اتصلو عليهو .. وادوهو اتكلم مع الشيخ الشيخ قال ليهو قال ليهو اسمع يا ياسين انت حافظ الاخلاص والفلق والناس حفظ صحيح ؟؟ كدي اقراهن لي ..
قراها صحيحة مية المية .. قال ليهو طيب .. جيب صحن موية
واقرا فيهو الاخلاص سبعة والفلق سبعة . والناس سبعة ..
وارمي الخيط جواها ولما تحس بيهو اتبلا تماما .. فك العقد واحدة واحدة ..
قال ليهو حاضر هسي انا بنفذ العملية دي .. قال ليهو بعد تخلص ارجع لينا بي تلفون .. الكلام ده كان قبل الجلسة الرابعة بي دقايق بس ..
الشيخ قال ليهم انتظرو لغاية ما الزول ده يورينا عمل شنو ؟؟
بعد عشرة دقايق اتصل ياسين وقال عملت الموضوع زي ماقال الشيخ ..
وطوالي بدأت الجلسة .. وكانت الجلسة رقم 4 .. الدكتورة عزاز .. اتاثرت تأثير خفيف كانت دموع بتنزل منها بي غزارة زي البتقطع ليها في بصل .. وبعد نهاية الجلسه قشت دموعها وكانت احسن من الجلسة الفاتت كتير ..
اما ميادة .. تتخيل البت قاعدة في الجلسة طبيعية مية المية ولاشي ماحصل ليها.. لا داخت ولا اتكلمت ولاتعبت بس مغمضة لغاية نهاية الجلسة.. وفتحت قالت انا ماحصل لي اي شي .. انا طبيعية وكانت مندهشة.. لاول مرة تسمع الايات دي وتكون طبيعية ..
هو اساسا قبل ينفك السحر كانت ماشة في تحسن مطرد لكن كدا (فوقع الحق وبطل ماكانو يعملون) ..
وبي كدا تأكد لدينا صدق المعلومات عن السحر المدفون في كسلا وانتهى الامر الحمد لله ..
طيب هنا في معلومة مهمة وسؤال بطرح نفسه ..
يعني مثلا انا لو معمول لي سحر.. وما اتوفقت اعرف مكانو واخراجو .. ما ح اتعالج مثلا؟؟
الاجابة كالاتي ..
السحر بتكون من حاجتين .. مصدر وهدف .. او ممكن تقول ارسال واستقبال
لايشتغل السحر بكامل قوته الابوجود المصدر والهدف ..
كيف؟؟.. المصدر السحر المدفون اللهو الخيط ده ..
والهدف اللهو الاثر الروحي في جسم ميادة .. كويس ؟؟
يلا لمن انت ماتتوفق لابطال مفعول المصدر اللهو الخيط .. بتقوم تقرا علي الهدف اللهو المريض نفسو .. فبأبطال التاثير في جسمه .. بكون السحر المدفون داك فقد فعاليتو طوالي .. ببقى ماعندو اي تاثير .. عبارة عن خيط ساي مدفون ..
ارجو انو كدا تكون الفكرة وضحت .. يعني حتى لو ما اتلقى السحر برضو القران ببطلو اينما كان والحمد لله على نعمة القران ..
اها نرجع للقصة طبعا ..الشيخ قال ليهم ماتسافرو مدني الا بعد اسبوع تقريبا .. حتى نتاكد من نتائج الفحص الطبي .. اخر مرة قستو الدم متين؟ ..
قال ليهو من يوم جينا من مدني تاني ماقسناهو .. لانها ما تعبت ولا احتاجت ليهو .. شفناها ماشة في تحسن والاستفراغ وقف والدوخة والفتور راحن ..
قال ليهو يومين كدا وامشو افحصو وروني النتيجة .. وباقي لينا جلسة واحدة بس بعد اسبوع للتتأكد والتحصين ..
المهم قامو طلعو والدكتورة اخدت مواعيد لي نفسها قبل الاسبوع ..
وجات الجلسة بعد تلاتة ايام تقريبا معاها امها .. وكانت الجلسة مركزة على المس وعارض الزواج .. وبفضل الله انتهى في نفس الجلسة .. وقالت انو ميادة بقت طبيعية مية المية .. وبقت تأكل اي حاجة.. وحتى صحتها اصلحت الحمد لله والناس متفائلين بالخير .. وبحمدو في ربنا .. وبدعو ليك ..
المهم ياجماعة للاختصار بعد اسبوع من بطلان السحر القاتل.. اتصل مصعب اخو ميادة على الشيخ وقال ليهو عملت تحليل الدم هسي .. وماكلمت اي زول .. قلت اكلمت انت اول زول .. لقيت الهموقلبين عامل 73% ياشيخ .وطبعا" دي نسبة ماكنا نحلم بيها .. وجايينك بكرة ان شاء الله .. اللهم لك الحمد .. الكلام ده كان زي الساعة خمسة عصرا ..
وعوض كل مرة يشيل ويتصل .. وصلاح ده فرحان لدرجة ماتتخيلوها .. اها في نفس يوم التحليل .. بالليل مشو صلاح وعوض للديوم الشرقية .. مواعدين مصعب يطلعو مع بعض ..
وقعدو شربو الشاي .. وكان يوم فرحة ماتتخليوها .. والناس ديل كلهم قاعدين في الحوش برة بعد المغرب .. وبتونسو .. مصعب اخو ميادة قال.. ياجماعة والله انا طالب من خالتي دي طلب .. كان رفضتو لي بسافر كسلا طوالي ... خالتو قالت ليهو اطلب عيوني ياحبيبي .. قال ليها تحنسي لي عزاز دي تقبل بي .. قالت ليهو عزاز لاقياك وين المغفلة .. هي قالت ليك مابياك ؟ قال ليها الشهادة لله ماسألتها ..
قامت عزاز دخلت جوة .. مامعروف مالا ؟ ياربي خجلانة؟ ولا زعلانة ولا شنو؟
ام ميادة قالت لي ميادة خشي عليها انتي ياميادة.. شوفيها مالا..
ميادة دخلت عليها لقتها بتبكي .. قالت ليها مالك يا عزاز .. قالت ليها والله انا ماكنت بحلم انو مصعب يقول عاوزني .. والله يا ميادة ده يوم المنى .. انا ببكي بالفرحة .. وكوني ح اكون في مدني مع ناس خالتي.. والله ما تتخيلي فرحتي ان شاء الله يارب يكون جادي .. قالت ليها كيف ماجادي هو لعب هو .. والله يقول كدا ولا كدا طوالي نسافر ليهو كسلا ههههه ..
ميادة طلعت برة قالت لي مصعب اخوها مبروك ياوهم هه.. قال ليها بالجد؟؟ .. قالت ليهو اي بالجد لكن عمرك ماعندك اوتوكيت .. هسي ده كلام بقولوهو بالطريقة دي ؟ كان اول حاجة تتاكد من مشاعرها قبل ماتقول عوارتك دي ..
قال ليها انتي ماعارفة اخوك بحب يخت الناس امام الامر الواقع ..
قالت ليهو غايتو المرة دي نجحت الحمد لله ..
ام ميادة قالت ياجماعة والله فرحتين في يو واحد كدا بجيني سكري حرام عيلكم ياناس .. حرام عليكم ..
قام صلاح قال ليها ياخالتي انا داير اديك واحدة تالتة احتمال تجيك صدمة .. قالت ليهو اها ياربي تلطف ..
قال ليها احتمال نحن بداية الشهر الجاي نجيكم لي ميادة .. قالت ليهو لالالا انت لازم تصبر شوية .. قال ليها لكن انا كلمت ابوي البارح ياخالتي ووافق ..
قالت ليهو خلاص دام كدي.. الفيها خير ربنا يسويها .. ربنا يديكم العافية .. والله انا الليلة بي فرحتي بي ميادة .. كان في زول قال تعال ندقك بمشي ليهو ههههه
المهم انتو هسي اطلعو امشو لي مشواركم وماتتاخرو عشان باكر عندنا مواعيد مع الشيخ ..
الجماعة طلعو مشو حوش السمك التلاتة .. عوض الحبيب .. وصلاح . ومصعب .. وبتونسو التلاتة .. عوض ساكت ساي .. وكل مرة يتبسم .. وفرحان انو ربنا نصره .. طبعا هو الاقترح للناس ديل يجو يتعالجو بي كلام الله .. عشان كدا حاسي بي الانجاز .. واكيد ربنا مابضيع حقو ..

اها وكت قعدو فوق الطربيزة بتاعة العشاء .. عوض قال ليهم والله كل واحد فيكم امورو وضحت الا انا.. سافرت مدني وجيت بي خفي حنين .. والله شرابات حنين ذاتهن مالميت فيهن.. الحمد لله ..عايتو ..
صلاح قال ليهو والله ياصلاح انت زول محظوظ .. وبي سفريتك لي مدني دي انقذت انسانة من موت محقق ..
ياخي شوف سفريتك لي مدني دي .. اول حاجة كانت سبب في انو تعرفني واعرفك .. وكانت سبب في علاج ميادة هسي انت لو ماجيت مدني كان بحصل شنو .. المهم وتانيا كنت السبب في انو مصعب يشوف عزاز بعد عشرة سنة وتعجبو ويموت فيها فجأة كدا .. انت تاني داير شنو ياعمك.. والله انت اسعد مخلوق ..
عوض قال ليهو والله صدقت .. ياخي انا فرحان بالموضوع زي مافرحت بي علاج حافظ اخوي والله ..
لكن اقول ليكم حاجة .. انا قعد افكر في حركة كدا ماعارف نتيجتها شنو؟ وخايف من نتائجها ..
قال ليهو قول ..
الى اللقاء ..
 
 
 
 
 
 
    رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 11 ( الأعضاء 0 والزوار 11)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
ضياع الدر ... للكاتب طارق اللبيب هيثم حاج على منتدى القصص والروايات والدراسات الأدبية والبوح 29 06-13-2014 10:31 AM
رواية الشامة - طارق اللبيب طارق اللبيب منتدى القصص والروايات والدراسات الأدبية والبوح 50 11-24-2011 09:22 PM
إنطلاق حملة ( عصا موسى لمكافحة السحر والشعوذة ) أنصار الرحمن المنتدى الإسلامي 1 03-26-2011 10:20 AM
ترحيب بالشيخ الجليل طارق اللبيب.... nusa إجتماعيات الشبكة 50 04-02-2010 08:51 AM
في كيفية حساب القيمة الإيجارية للأماكن المعدة لغير أغراض السكنى إعمالا لأحكام القانون المستشار القانو المنتدى القانوني 9 03-14-2006 09:48 PM

Facebook Comments by: ABDU_GO - شركة الإبداع الرقمية
Preview on Feedage: -%D9%85%D9%86%D8%AA%D8%AF%D9%8A%D8%A7%D8%AA-%D8%B4%D8%A8%D9%83%D8%A9-%D8%A8%D8%B1%D8%A8%D8%B1- Add to My Yahoo! Add to Google! Add to AOL! Add to MSN
Subscribe in NewsGator Online Add to Netvibes Subscribe in Pakeflakes Subscribe in Bloglines Add to Alesti RSS Reader
Add to Feedage.com Groups Add to Windows Live iPing-it Add to Feedage RSS Alerts Add To Fwicki
Add to Spoken to You
Feedage Grade C rated

Google

Powered by vBulletin® Copyright ©2000 - 2017, Jelsoft Enterprises Ltd. BrBrNeT
F.T.G.Y 3.0 BY: D-sAb.NeT © 2011
كل المواضيع والمشاركات المنشورة في منتديات شبكة بربر تمثل وجهة نظر كاتبيها ولا تمثل بالضرورة رأي شبـــــكة بربر
اخر المواضيع

تطبيق مسابقة عظماء الإسلام @ تطبيق جامع الكتب التسعة @ تطبيق دوولينجو المميز لتعلم اللغات - استعراض و مراجعة @ لعبة البالونات التعليمية للاطفال @ متجري دليل المتاجر الإلكترونية حمل التطبيق! @ لعبة Halloween Endless Night @ داعيات سعوديات ينتظرون فزعتك ووقوفك بجانبهن (صورة) @ وداعاً 2016م @ تطبيق قصص لكل مسلم @ لعبة سباق نينجا التنين @


 شبكة بربر

Google Adsense Privacy Policy |