BRBRNET

جديد الأخبار
جديد المكتبات
جديد الملفات
جديد الصور

الصحف السودانية
الأهرام اليومالصحافةالوطن أخبار اليومالأيامأخر لحظة الرأي العامالإنتباهةقوونالصدى
 

جديد الصور

المتواجدون الآن


تغذيات RSS

سواليف عيون المها
05-02-2011 04:20 PM

[CENTER
]سواليف عيون المها ........
........



من سماءْ من ارض يا قلبي كوس لك مخرج
حالك ما بيسر ........أصبحت فيك انا محرج
معاك انا شــن بسوي اصبحت مشلول اعرج
مزروع فوق حجـــــر لكين وقع وإدحرج
.
.
يا الزمن المبشتن.... واللهِ ما فيك خير
مادرت الصلاّح......... فرقت بينّا كتير
فاطنة واعتدال ....... صابن غبار امير
ولو كان في المراد كان جبنا لبن الطير
.
.
وفي أصل الجهاد ....النصر والله شهاده
وروحي انا من زمااان قد فارقت مشهادا
الحب في الإله ........ والله اسمى عبادة
ونفسي انا ما بتتوب لسه مواصلا جهادا
.
.
وما هطل المطر ...ساكت رُشاش ورذاذ
وناري الما انطفت....... بتذوب الفولاذ
لامتين الخلاص....... يا فاطنة والإنقاذ
وخاطري انا ما انجبر ما عرفت ليّا ملاذ
.
.
ويا عيون المها ...مالك منوسرا جراحي
انا بنسج وميضك قرمصيص ليْ افراحي
الحيـــاة والممات بينات رميشك ضاحي
ارجع ياغشيم ...... ياقلبي خليك صاحي
.
.
يا عيون المها حارماي ليه من ودك
اقرب ليك دوااام واراكي زايد صدّك
قلبي مكبلاو ســــاقياو حناضل عندك
ارجوك رجعيو ناسي المفاتيح عندك
.
.
.
يا عيون المها ...مالك سـرقتي منامي
ما هاميــك كتير دمعي الصبيب الهامي
أيازهور الأقاحي........ الفتقت إلهامي
شوقي انا ليك بحر ممدود دوام مترمي
.
يا والي الولاة مولايا تســــتر حالي
تسخر ليْ رضا ست اللهيج الحالي
مرفوع الزعل ممنوع طلوع العالي
بنخاف ينكسر خاطرك علينا الغالي




ولو كنتي المحال أنا في المحال برجاكي
أرجع مســـتحيل دون أُحظى بي لقياكي
يا إلهام حــرام انا طـــرفي اصبح باكي
فيكي انّْا ما غلطـتْ برينـي بس برضاكي
وللقاضي المقيم بشكيك هناك فيْ بربر
رافــــــــــع دعوتي زولاً تعب وإدردر
مغلــوب ما بطيق انا تاني تبْ ما بقدر
تمويني إنقطــــع حرمـوني من السكر
.
وبطلب وإلتمس ينزل بُشاري محامي
يســترحم جنـابك وإنتّ قدرك سـامي
ياحامي الحِمى الحاميني دايماً حامي
حكمك لي ظلَم جافيتني درت خصامي
.
مواكب مــن كواكب في عيـــــونك بادية
يا عيــون المهــا الضــوت وهاد البادية
إيه داعي الزعل ظالماني وإنتـي البادية
أضحكي ضحكي عبدلله ســـامية وشادية
.
لي شخصِك رسـمت وكم كتبت روائع
وبي إسمِك هتفتّ اصبحت ملهم رائع
حبـِــك فيني ذاب في دمي أصبح رائع
روعتي القلـوب يارائعة روعــك رائع
.
مجّــدك الإله ربـــــــــي البديـــع المُحييّ
وقد ســكن الجمال فيك ياجميــلةْ المَحيي
ما تنكســـــــفي منـي كفاكي أن تـستحيي
أحيّيتي الشـعور إنشـاء الله تكبري تحيي
.
فاح طيبــــك عبق روجتي عطـرك خُمري
وأنعشتي القليب أسكرتي من دون خمري
أشعلتي الشـــعور يا شافعة شعرك خُمري
مخمـــور بي هواك خامرني لون الخُمري
.

بي صـفاْ بي مـودة أنا قلبـي حبّ ودارِك
مشتاق أُحظي يوم بي جلسـة يوم في دارِك
ماك دارياهو حالي البيـك عرفــو انا دارِك
ولـو دايراو وداري انا مابـــدورو ودارِك
......................................................


الجزء الأول كان بيني وبيني وفيما يلي الجزء الثاني من الحوار الذي كان بيني وبين الشاعر محمد الشيخ المضوي ( شاعر بربر وقاضي أراضيها من ابوحمد لي عن خليوه شرق وغرب ...) ......
مناسبة الحوار بالتفصيل لأنو كان ليهو صلة بهذا العمل ...... وقع في ايدو وقام كتب لي وانا كتبت ليهو وهو كتب لي وانا كتبت ليهو لمن اصبح حوار اُشتهر بي اسم عيون المها ....

.
كان ذلك في عام 1998م تقريباً ......



ود الشيخ :-يالأستاذ أخوي أنا قد قريت أشعارك

عن تلك الديار شطّر رويت اخبارك

قلت ديارنا فيها ظبيــاً مولع نارك

كيف تأتي الذِكرمن غير تحمس طارك
.
.
ودجارالنبي :-
ود الشيخ أخوي أنا ليك رويت أخبـاري

عاشق في الذِكر دايماً محمس طـــاري

دا الجـــــــــدي الرتل دايماً مولع ناري

بارع في النفور وأنا ليهـو دايماً طاري
.
.
ود الشيخ :-

ود جارالنبي النجم الموهــج وسـاري

سهران ليلو لي عيوناً كواحـل طاري

في مسرح نصوص العشق مو متواري

راكب فـــي قطار الحب مبدِّر ســـــاري

***
نحنا ديارنا قافره برغم إنها عامــرة

تستوي فيها منفوخة الكرش والضامرة

الناس في الكراسي تقول تماثيل سامرة

أشرعة الإخاء مطويه كاشـه وكامـــره
.
.
ودجارالنبي :-

دياركم بي وجودكم ديمه أصلها عامره

صاحي العندليب فيها الليالي القامـــرة

يعجبني القعاد والناس تكون متسامرة

أشرعة الإخاء مفروده كاسحه مغامرة
.
.

ود الشيخ :-

رغم وجودنا الناس مشـاعرا ضامره

مرات في وجوم مرات تكون متنامره

يعجبنا القعاد والناس تكون متسامره

لكين كيف نحققه بي عيون متحامرة

***

يا أستاذ نصيحتي إليك نصيحة مفيدا

وقف لي القصيـدة الإبتديت ترديــدا

ماتطلب وداد من زول قليبو حديــدا

راصنات الشـــــعر ماتسـتحق تبديدا
.
ود جارالنبي :-

ود الشيخ نصيحنك لي ماها ســــديده

كيف أترك مرافي شعوري اسيب الريده

الزول القبيل القلت قلــــبو حديـــده

لا بد يوم يحن سـاكت مشاعره عنيده


ود الشيخ :-

يا أستاذ نصيحتي إليك نصيحة سديده

وجه لي سفين عشقك برحله مفيــده

الزول القبيل قت لك قليبــو حديده

بي يجعل قلوب عشاقو سايحه مديده
****
نحن ديارنا في تعدادا أكبر قـــوه

قوه كبيره مابتعرف زماله وخوه

ما بفتوكا لو كوركت ياابو مروه

فوتك منهم يدوك في الترقــــوة

ود جارالنبي :-

دياركم إنتو في تعــــــداد أكبرقـوه

أيضاً فيها زُمال الوداد والخـــوه

بس مُر الزمن مسخ النفوس من جـوه

خلى الناس تلاهي تسوي يا أبومـروه


ود الشيخ:-

ديارنا كبيرة في تعـدادا أكبر قــوه

فاقدين في مرور نسماتا نسمة خـوه

كيف مرّالزمن يأذي النفوس من جــوه

الواجب تكــــون متعانقه حبومروه
.
ود جارالنبي
دياركم عامره بيكم وبي الم نقبلكم قد فاتو

قد كان الأخو دايماً ينال من إحترام أخواتو

كان دايماً ودود ورحيم وسـمحه صفاتو

يارب ياكريم الحال دا لملوشـــــتاتو
.
.
ود الشيخ :-
الدار يازميــل ما بمعمروها الفاتو

بل بي عمروها الجوه ساحتا باتو

زي الدنيا مابعمروها ناسـاً ماتو

هيهات لوري منعوش تبتهج كنباتو
***
يا أسـتاذ قصايدك راقية رنتا داويه

إلا مـن الرهاب حاولت تجلب راويه

كيف صوت ينسمع من الديار الخاويه

الأصحابا مابعــرفو الضلع منزاويه

.
ود جارالنبي :-
ود الشيخ كيفن..؟ تقــول دياركم خاويه

وإنتو أهــل الوتر للفـن قلوبكم زاويه

أيامنا الزمان من الوساوس خاليـه

تعالوا نعيدها تاني عشان تكون متواليه

.

ود الشيخ :-
ماقُتّ من فراغ عـن الديارالخاويه

لاحظت الجميع كل زول لبد في زاويه

مرات في الشجار تصبح حلوقهم عاويه

ومرات لـي إثارات المشاكل ناويه
.

نحـن ديارنا فيها المهرة والبُريبه

وكدايس الزباد والبانه والقُسـيبه

زُمبارة العشر ماتنتظـر تطريبّا

والبي تجهـل الحب كيف بتبقي حبيبه
..... !!!! .....
؟
.
ودجارالنبي :-
دياركم ديمه عامره إنشاء الله مالتنفضّ

نلقاكم دوام عايشين إخاء ومــوده

اللقاء والعـــدم ما في الدهب والفضه

قيمة الناس دوام يجتمعوا ساعة الشدة


ودالشيخ :-
دارنا إنشاء الله عامره وزاهره ما تنفضّ

يبقى الناس دوامعايشين إخاء وموده

الزول أب عيوناً لاصـفه زي الفضه

شـاحد الله الكريم في يوم عليِّ ينقضّ
.
ود الشيخ :

ياأســتاذ سـباك ظبياً كحيله عيونو

براقالخريف في سارية لمعو سنونو

لكين قولي هل في الحب عرفت شئونو؟؟

كيف تتطلب مفلس أن يحـل لي ديونو ؟ !!
ود جارالنبي

ود الشــيخ جدي الريل دا أسكت خلو

علي ديناً كتيييير إنشاء الله أقدر أحلو

أدانـــي الأمان واجب علــيّا أجلو

لو ألقي المراد إنشاء الله أعيش في ضلو
.
جارالنبي :-

ود الشيخ نصيحتك والله قاسيه عليّا

كيف أرضى البعـاد من العيونو جليّه

لوأُمنـــع يمين الموت يكون خير ليّا

ماأظن ترضـى ليا نصيحه تبقى أذيه



ود الشيخ :-

أنا ما برضى ليكا نصيحه تبقى أذيه

قمت بواجبي في صحبـــــةًً مرعيه

كيف الأُسـد للغزلان بتبقــى ضحيه

أهرب قبل ما تنصــــاب بديقه قويه
.
ود جارالنبي :-
ود الشيخ حقيقه الحالة أضحت كعبه

إنشغل الجميع والعيشـــه أضحت صعبة

من بعـــــد الملام مانبقى عـاد في رقبّه

بنصحح دروبنا نخلـــــــي درب العقبة


ود الشيخ :-
يا أســـــــتاذ لو الحالة أضحت صعبه

حقو الناس تشيل البعض فوق الرقبه

مايستسلموا يتابعوا الظروف الصعبة

بســام الوجه من واجبو يفدي الرقبه
>ود الشيخ :

البتحبو ياالأستاذ مابقدر ودادك وحبك

والبتصــــادقو في ذات مره ما بفخربك

مالك يازميـــــل تاعب لفـكرك وقلبك

هيهات مـــره نمثال الرخام يشعربك


ود جارالنبي :-
راصنات الشـــعر خيلاً مروضا دربك

مالك يالمضوي خربان مشركن قلـبك ؟؟

بي رُقية شـــــعر كل النفـوس تفخربك

وتمثال الرخام يصبح حمام يشــــعربك.
>
ودالشيخ :-
راصنات الشـعر الحائزات لي حبك

يالأسـتاذ معمر بيها عقلك وقلبك

مسدار العيون في الشاعرين يفخر بك

شــاحد الله الكريم دايماً ينور دربك
>
ود الشيخ:
راصنات الشــــــعر خيلاً معركسه بيا
حاشاي من خراب القلب أنا أخو بنيه
نارك يا زميلي معـاها ناري الحيـه
رحمن العبـاد يعطف عليك وعليّا
>
يالأسـتاذ بقيت حاير دليلي أنا بّيا
عاشـق للعيـــــون الكاحله ربانيه
عاشق لي اللباقه مع الشعور الحيه
عاشق لي الثقافه إنشاء الله تعشـق ليّا
ود جارالنبي :-

ودالشــــيخ أراكا عرفتّ كلّ البيّا

نارالعود تمـوت نيراني لسـه حيه

مسـدار العيــــون أراهو ســبب ليّا

جرحاً فوق جـروح ما أظن بتبرى ليّا
.
.
!
؟
وموصول التحية للشاعر المضوي ..... شاعر بربر الظريف محمد الشيخ مضوي .
.
.
سنواصل في غدٍ بمشئة الله .....
.
.
ولا يفوتني ان اذكر ايضاً الشاعر كمال العجيل كان يعمل ايضاً بمحكمة بربر وقد وقع هذا الحوار يده ويبدو أنه كان أيضاً متيماً كحال المضوي وحالي ،،،،، فراح مطلقاً عنان الخاطر المكبوت حتى اخرج قصيدة تحدثت في مضمون الحوار وارسلها لي ......
سأبحث عنها واآمل أن أجدها حتى أضمنها هذا البوست هدية لكم جميعاً ...
.[/center]

تعليقات 1 | إهداء 0 | زيارات 911


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#51 [المشرف ali]
1.25/5 (4 صوت)

05-22-2011 12:51 PM
التحية لشاعر بربر الظريف ( محد الشيخ المضزي وموصول التحية ايضاً للشاعر كمال منصور العجيل الذي شارك ايضاً معقباً على الحوار الذي دار بيني وبين ود الشيخ . ..على قرار المصائب يجمعن المصابينا حيث انه كان متيماً ايضاً كحال ود الشيخ .... وهو
الشاعر / كمال منصور العجيل .... يعلق على حوار مسدار عيون المها
..........................................)
ود جارالنبي مســـــــدارك جميل واللهِ
مفتون بالجمال بالحب دوام بتباهي
معليش يا رفيق انا برضو زيك لاهي
ما تقول نلتمس عـــذرك معـاك واللهِ
.....
الحبّ الشــريف تعرف تجيد لي فنو
كلام الناس كتير خليـك سـيبك منو
حب حسن الخصال نفس الشعور خافيُنو
خليهم يقول وان شاء الله الجماعة يجنو

......
جاريت الجميع يا اخويا في تخريفُن
ونظمتّ الشـعر وأجدتّ تميت كيفُن
يا هو البِعجبن الحكمــة في توظيفُن
يحبوا اللخبطة دائماً شتاهُن وصيفُن
...
يا عاشق الأدب وعقلـاً رجح بـ ثقافة
ما قصدك جمال لا عيون وجيد لا قيافة
قصدك كان شـــريف فهمو غلط وهيافة
استلطاف طبــاع تعجب جميع الشافه
.................
كان تســـألني قُبّال ما تبشتن حالك
مشيت نفس الطريق يا اخويا من قبالك
قصدي انا كان شريف نفس الحواهُ مقالك
استلطاف طبـــــــاع فهمو غلط عذّالك
...........
كلّ القلتو صاح ما الزول سـمِح بالجد
سماحتو مكملا يا اخـــوي وفايت الحدْ
أتاري أنا ما برايا الضقتّ منو الصـدّ
الاستــــاذ معاي خلـــي الرهيف تنقد
...
رغم عرفتي ليك يا خوي تقيـــلاً راسي
ساقتني الظنون جاطت علــيْ في راسي
قتّ أصـدقها وفاكــر دوام ما ناسي
دا الزول القبيل فرقني عاد من ناسي
...............
ود الشيخ نظم سطر حروفو نديه
مفطور بالجمال بي خلقـة ربانيه
حركو هوززِو خليّْ اليشتت ليأ
مسـتور القليب يظهر امام عينيّا
...
ود الشيخ أخوي كاتم العليو وصابر
شكراً ليك كتير حركت مِنُو مشـاعر
يغلف في الكلام لكن اماميْ اْنا ظاهر
بي حِبّ الجمــال ساكت مكابر وناكر
...
المسدار عظيم كيفِن نطولو سماهو
بنحاول نقلـِّد والدريب نبراهـو
نطلبك السماح لو الحديد فتناهو
وليك هذا الشـعر للونسة ولفناهو
......
مســـدار العيون قلّب عليّ مواجع
خلاني انتبِه لي حسابي تاني أراجع
ذكّرني الزمان قرّبت اجيكم راجع
رجعتّ أنا للقلم القلت ليو ما راجع
...
مساهمة من اخوك سميها زي ما عايز
ما شبه الشعر إبداء شعور لو جايز
استاذي العظيم كلّ المكارم حايز
أقبلا عِدّها تخريف كُبار وعجايز
...........
كمال منصور العجيل
مجمّع محاكم بربر 2/5/1998م


علي جار النبي المحامي
علي جار النبي المحامي

تقييم
1.00/10 (3 صوت)

Preview on Feedage: -%D8%B4%D8%A8%D9%83%D8%A9-%D8%A8%D8%B1%D8%A8%D8%B1-%D8%A7%D9%84%D9%85%D9%83%D8%AA%D8%A8%D8%A7%D8%AA- Add to My Yahoo! Add to Google! Add to AOL! Add to MSN
Subscribe in NewsGator Online Add to Netvibes Subscribe in Pakeflakes Subscribe in Bloglines Add to Alesti RSS Reader
Add to Feedage.com Groups Add to Windows Live iPing-it Add to Feedage RSS Alerts Add To Fwicki
Add to Spoken to You

Powered by Dimofinf cms Version 3.0.0
Copyright© Dimensions Of Information Inc.
Free counter and web stats

brbrnet.net